قول کینہ ملک ءِ دُوارہ شونداری نا کنڈآ دینہ، احسن اقبال

اسلام آباد: بنجائی وزیر ڈٹ بندی، شونداری، اصلاحات و خصوصی گام گیج احسن اقبال پارینے کہ پاکستان نا دویک ورناآبادی ءِ تعلیم، روزگار و کسبکاری نا تعلیم تننگ نا وارخواہی فراوان کروئی مریک، بدلی ورناچین ءِ گچین و روشنا آخبت تننگ ءِ، ملک اٹی سیاسی نزوری نا گرج ءِ، اگہ ننے شون ہلوئی ءِ تو ننے داملک ءِ سیاسی و پالیسی سازی ءِ سوگوی تروئی مریک۔ داخیال آتا درشانی ءِ او سے شنبے نادے آ وزیراعظم نا یوتھ ڈویلپمنٹ پروگرام واکدار ورناتا بنائی دود آن تران کرسا کرے۔ بنجائی وزیر پارے کہ پاکستان نا دویک آبادی ورناچین آ تالان ءِ۔ پاکستان نا ورناتے تعلیم، روزگار و مہارت نا تعلیم تننگ نا وارخواہی تروئی مریک۔ 2013 ٹی ملک دہشت گردی نا مون اٹی ئس، پیشن نا زرکاراس پاکستان اٹی زرکاری کننگ کن تیار الوکہ۔ اوپارے کہ نن بجلی نا تنکی نا مون ءِ تورین۔ تھری ایز آ کاریم کرین ملک ءِ 2018 اسکان تینا نت تیا سلفین۔ 2018 ٹی 11 ہزار میگاواٹ قومی گریڈ اٹی اوار کرین۔ ملک ءِ دہشت گردی آن پاک کرین۔ سی پیک ءِ سرسہب ءُ ڈٹ تسن۔ چین ارب آ ڈالر نا زرکاری کرے۔ بنجائی وزیر پارے کہ 2017 ٹی امریکہ، برطانیہ و ایلو ملک آتا سفیر دا اَرفیرہ کہ امر اوفتا ملک آتا کمپنیک سی پیک اٹی زرکاری کننگ کیرہ۔ بدلی گڑاس کرسا نشان تننگ نا پن ءِ۔ بدلی ہمو چورن اف ہرادے خار نا کاغد اٹی پلویڑ کرسا راج اٹ خارتالان کننگے۔ بدلی ورناچین ءِ گچین و روشنا آخبت تننگ ءِ۔ بطور وزیر ڈٹ بندی تینا ورناچین ءِ زرگزران اٹی تینا کڑد ءِادا کننگ و ملکی شونداری ٹی حصہ دار کننگ کن ڈٹ سازی کننگ کنا فرض ءِ۔ احسن اقبال پارے کہ 2018 ٹی ملکی شونداری ءِ تہس نہس کننگا۔ اسہ بندغ اسے ہیل ترسا ترسا ملک انا بیڑہ ءِ غرق کننگا۔ ملک انا زرگزران نا بنداوتے خورک کننگا۔ 2022 اٹی حکومت ہلنگ آن مست ہی وزیر خزانہ پڑو کریسس کہ آخیریکو سہ ماہی ٹی ریلیز کننگ کن ہچ اس اف خزانہ خورک ءِ۔ شونداری نا مزل آتے اسہ سازش اسے نا کمک اٹ کریش کننگا۔ اینو نن ولدا قول کینہ کہ دا ملک ءِ دُوارہ شونداری نا مزل نا کنڈآ دینہ۔ پاکستان نا 75 می سال دے آ ننے عزم کروئی ءِ کہ پاکستان ءِ اسہ وار ولدا دنیا نا گچین زرگزران تیٹی اوار کینہ۔ ننتون نئے وسیلہ غاتا و نئے لائخی تا کمتی ءِ بس ننے شونداری نا کسر آ چلینگ نا گرج ءِ۔ ملک اٹی سیاسی نزوری نا گرج ءِ۔ اگہ ننے شون ہلوئی ءِتو ننے دا ملک ءِ سیاسی و پالیسی سازی ءِسوگوی تروئی مریک۔ ننے پولرائزیشن نا زیار ءِ چٹفوئی مریک۔ کس اسے تون دا حق اف کہ ایلو نا نظریہ غاتیا اعتراض کے ولے تینا پسند ءِ کس اسے آ شاغنگ کپک۔ اوپارے کہ ننا غٹ آن بھلا شناخت پاکستانی مننگ ءِ۔ اسہ ایلو ءِ شیف خلنگ آن دنیا ٹی عزت سلپک۔ پاکستان ءِ ہمو قیادت مزل اسکان سرکننگ کیک ہرا قیادت، تقسیم و بیچیٹی نا سیاست آن مرمریک۔ اوپارے کہ یو ایس پاکستان نالج کوریڈور ڈٹ انا رداٹ پاکستان نا ہزار طالب علم آتے پی ایچ ڈی کن امریکہ نا ٹاپ تعلیمی ادارہ غاتیٹی اسکالر شپ تننگک۔ بنجائی حکومت ورناتے تعلیم نا وارخواہی فراوان کننگ کن پاکستان نا چندی ضلع غاتیٹی 21 جامعہ غاتا سب کیمپس جوڑ کیک۔

(اے پی پی)