پوسکن آ سال انا امن و شونداری کن دعا کینہ، شہباز شریف

اسلام آباد: وزیراعظم محمد شہباز شریف قوم ءِ پوسکن آ اسلامی سال انا مبارکبادی ترسا پارینے کہ دا پوسکن آ سال پاکستان و عالم اسلام کن امن، شونداری و شونہالی نا سال مرے، سید نا امام حسین رضی اللہ عنہ و اونا سنگت آک سچائی و عدل و انصاف نا اصول آتے برجا تخنگ کن بے مٹ قربانی تسر۔ جورو استبداد نا برخلاف اوفتا بدل مفروک یقین، جیرت، قربانی و لگن نا لازوال درور ءِ۔ چارشنبے نادے آ وزیراعظم آفس نا میڈیا ونگ آن جاری کروک بیان نا رداٹ وزیراعظم ہجری سال 1445ھ نا بناء آ قوم انا پن کلہو اٹی پاریے کہ مچ آ قوم و امت مسلمہ ءِ کنا کنڈآن پوسکن آ اسلامی سال مبارک مرے۔ کنا دا دعاءِ کہ دا پوسکن آ سال ملک ءِ پاکستان و عالم اسلام کن امن، شونداری و شونہالی نا سال پک مرے۔ اوداہم دعا کرے کہ دا پوسکن آ سال اٹ مچ آ دنیا ٹی ہراڑے کہ مسلمانک مصیبت آتا گواچی ءُ اوفتے کن اللہ رب العزت بے شمار آسانی ودی کے، کشمیر و فلسطین نا مخلوق آ تموک ظلم و جور انا تہاری چٹے و ہموڑے امن و آشتی نا سہب انا روشنائی ننا مسلمان ایڑھ ایلم تا زند ءِ شونداری و شونہالی اٹ روشناکے۔ وزیراعظم پارے کہ پوسکن آ اسلامی سال تاریخ نا ہمو خرین آ وخت آتے ہم یات ترفک ہراتم حق و باطل نا جنگ اٹ آل رسول صلی اللہ علیہ و آلہ وسلم حضرت امام حسین رضی اللہ تعالیٰ عنہ نا کماشی ٹی تینا جون تے ندر کرسا تانسکان دنیا اَرے اوفتا پن زندہ ءِ۔ اوپارے کہ سید نا امام حسین رضی اللہ عنہ و اونا جان نثار سنگت آک سچائی و عدل و انصاف نا اصول آتے برقرارتخنگ کن بے مٹ قربانی تسر، جور واستبداد نا برخلاف اوفتا بدل مفروک یقین، جیرت، قربانی و لگن نا لازوال درور ءِ، داواقعہ ننے ہمدردی، انصاف و سیوت نا ہمو قدرآتا یات ترفک ہرا ننا ایمان نا مرکزی جزو ءِ و ننے ناانصافی و جور انا برخلاف بش مننگ و اسہ ہندن ءُ راج اسے کن کاریم کننگ نا درس ایتک ہراڑے امن، ہم آہنگی و تین پہ تینی شرف غالب مرے۔ اوپارے کہ اینو نا دے ببونن قول کین کہ نن تینا نبی محمد صلی اللہ علیہ و آلہ وسلم و اونا صحابہ غاتا کنڈآن جوڑ کروک بڑزکو سفت آتا تقلید ءِ کننگ نا کوشست کینہ، ببو نن تینا اختلاف آتیان ایڑتر رواداری، افہام و تفہیم و اسہ ایلو کن شرف ءِ مون آ دین۔ ببو اسہ ہندن ءُ راج اسینا جوڑ کننگ کن کاریم کین ہرا راجی انصاف، بریبری و ہمدردی نا اصول آتے برقرارتخے۔

(اے پی پی)