پشاور،چیک پوسٹ نا خڑک آ پولیس موبائل آ جلہو، اِرا کارندہ شہید

پشاور:  پشاور ریگی ماڈل ٹاؤن چیک پوسٹ نا خڑک نن نیمہ غا پولیس موبائل آ دہشت گرد آتا جلہو اٹی اِرا پولیس کارندہ شہید و اِرٹ ٹھپی مسنو۔ ایس پی ورسک ارشد خان پارے کہ بنائی جاست وپاست نا رداٹ شہید مروک آ پولیس کارندہ پولیس موبائل آ گاڈی ٹی ساڑی ئس ہراکہ چیک پوسٹ آن نفری ءِ بدل کننگ کن سرمسوسس کہ دہشت گرد آتا سم کاری نا نشان مس۔ ایس پی ورسک ارشد خان پارے کہ دہشت گرد آک خڑک انا قبرستان آن پولیس موبائل ءِ شست کریر۔ اومستی پارے کہ دہشت گرد آتا جلہو اٹی پولیس نا اِرا ورنا شہید مسر ہرافتے ٹی اسہ موبائل ڈیور فرمان و اسہ ہیڈ کانسٹیبل واجد اوار ءُ، وخت اس کہ اِرا پولیس کارندہ فیروز و سیال بھاز ٹھپی مسنو ہرافتے خیبرٹیچنگ ہسپتال آ گدریفنگانے۔ جلہو گیر نن نا تہاری نا فائدہ ءِ ہرفسا نرار ولے علاقہ ٹی اوفتا دزگیری کن سرچ آپریشن برجاءِ۔ پولیس چندی شکبر بندغ آتے حراست اٹ ہلکنے و اوفتیان جاست وپاست نا بناءِ کننگانے۔

(اے پی پی)