صدر علوی صوبائی گچین کاری تے کن تاریخ اس تس
آئین و کانود نا رد اٹ 90 دے آن زیات ہُرے کننگ نا موکل اف، آئین نا خلاف ورزی آن بچنگ کن تینا آئینی و کانودی زمواری تے سر تننگ المی تکوہ،الیکشن کمیشن چٹھی ٹی تاریخ نا اشارہ تسنے
Get real time updates directly on you device, subscribe now.
اسلام آباد : صدر مملکت ڈاکٹر عارف علوی پنجاب و خیبر پختونخواہ ٹی گچین کاری تا تاریخ تس۔ صدر مملکت الیکشن ایکٹ 2017 ء انا سیکشن 57 (1) انا رد اٹ 9 اپریل یک شنبے پنجاب و خیبرپختونخواہ نا صوبائی اسمبلی تیکن گچین کاری تا پڑو کرے۔ ایوان صدر آن جاری کروک بیان نا رد اٹ صدر مملکت پارینے کہ الیکشن کمیشن ایکٹ انا سیکشن 57 ارٹ نا رد اٹ گچین کاری تا پروگرام ءِ جاری کے۔ آئین نا رد اٹ آئین نا رکھ انا سوغند ہرفینٹ‘ ایہن تو اسہ عدالتی فورم اسے آن ہم ہچ ءُ امتناع نا پرمان اس متنے ہندا سوب آن سیکشن 57 (1) نا رد اٹ صدرنا واکداری تے کاریم اٹ اتنگ نا ہچ ءُ اڑانداس اف، آئین و کانود 90 دے آن زیات ہُرے کننگ نا موکل تفک‘ آئین ناخلاف ورزی آن بچنگ کن گچین کاری تا تاریخ نا پڑو کننگ نا تینا آئینی و کانودی فرض انا پورو کننگ ءِ المی سرپند مریوہ۔ پنجاب و خیبرپختونخواہ نا گورنر آک صوبائی اسمبلی تا پرغنگ آن پد 90 دے اٹ گچین کاری تا تاریخ ءِ پک کننگ نا تینا آئینی زمواری تے سر تفننگ ءُ، الیکشن کمیشن آف پاکستان ہم پنجاب و خیبرپختونخوا نا اسمبلی تا گچین کاری تے کرفنگ نا تینا آئینی زمواری ءِ پورو کپننگ ءِ‘ ہڑتوم آ آئینی دفتر آک گیند ءِ اسٹ ایلو نا کورٹ اٹ بٹنگ اٹی ءُ‘ دا وڑ آن ہُرے و آئینی ٹک آتا خلاف ورزی نا خلیس ودی مننگ اٹی ءِ۔ الیکشن کمیشن مہالو آن تیناآئینی عہدیدار آتا پن تے تینا کیہی چٹھی تے ٹی گچین کاری تا گمانی تاریخ تا اشارہ تسنے‘ ہمو چٹھی تے ٹی 90دے اٹ گچین کاری کرفنگ نا الیکشن کمیشن نا زمواری درشان ءِ، اسمبلی تا لس گچین کاری تا تاریخ ناپڑو کن الیکشن کمیشن تون سلابت نا سنجیدہ عمل نابناءِ کریٹ‘ الیکشن کمیشن دا سرحال آ مروک دیوان اٹ بشخ ہلنگ آن بشخنداری کرے۔ سیکشن 57 (1) نا رد اٹ دوئی واکداری تے کاریم اٹ اتسا صوبائی اسمبلی تا لس گچین کاری تیکن 9 اپریل 2023 ء یک شنبے نا تاریخ ناپڑو ءِ کننگ اٹی اٹ۔
(آن لائن)