میر چنگیز جمالی نا کماشی ٹی پارٹی سوگو مننگ ءِ، سلیم کھوسہ

تمبو : پاکستان پیپلز پارٹی نا راہشون صوبائی اسمبلی نا باسک میر سلیم خان کھوسہ پارینے کہ پیپلز پارٹی صوبائی صدر میر چنگیز خان جمالی نا کماشی ٹی بلوچستان اٹی سوگو و منظم پارٹی نا وڑاٹ مون آ بسنے۔ ہرادے پین فعال کننگک۔ پیپلز پارٹی نا نعرہ اینو بلوچستان نا ہر کونہ کونہ غان بڑز مننگ اٹی ءِ۔ او پارینے کہ بلوچستان اٹ بروک آ پوسکن آ پاکستان پیپلز پارٹی نا دور ءِ دا وخت آ شریک چیئرمین پیپلز پارٹی مسکوہی صدر آصف علی زرداری و چیئرمین بلاول بھٹو نا کماشی ٹی پیپلز پارٹی نا پوسکن گچین مروک آ وزیرک تینا خدمت آتے پورو کننگ اٹی ءُ۔ سندھ اٹ وزیراعلی سندھ نوکاپ نا زہمی آ علاقہ غاتا پورو بحالی نا کاریم ءِ تینٹ ہننگ اٹی ءِ۔ ولے بلوچستان اٹ دا وخت آ نوکاپ نا زہمی آ علاقہ غاتا بحالی نا بنا متنے۔ او پارینے کہ ساڑی وزیراعلی بلوچستان نا ہچ ءُ سما اس اف کہ او دا وخت آ انت کننگ اٹی ءِ۔ صوبہ ٹی انفراسٹرکچر پورو وڑاٹ بھس مسوسس ہرا دا وخت اسکان بحالی کن ہروک ءِ۔ انشاء اللہ پیپلز پارٹی نا دور بلوچستان کن پوسکن ءُ دور اس مریک۔ و خاص کر او تینا حلقہ صحبت پور اٹ ترقی نا اسہ پوسکن ءُ باب اس ملرہ۔ دا خیال آتا درشانی ءِ او صحبت پور نا علاقہ گوٹھ یعقوب خان کھوسہ ٹی پیپلز پارٹی نا ضلعی صدر میر یعقوب خان کھوسہ نا کنڈآن اڈ ہلوک اسہ کارنر میٹنگ اسے آن تران کرسا کرے۔ او پارینے کہ مسکوہی صدر آصف علی زرداری و چیئرمین پیپلز پارٹی بلاول بھٹو زرداری جوان ءُ لیڈر ءُ۔ ہرافک ہراتم ملک اٹ حکومت کریر اوفک تاریخی ءُ گام گیج کرینو و ملک ءِ شونداری تسنو۔ او پارینے کہ بروک آ پیپلز پارٹی نا دور خننگ انگ اٹی ءِ۔ پیپلز پارٹی بلوچستان تون اوار مچ آ ملک اٹ کلین سوائیپ کرسا تینا حکومت ءِ جوڑ کیک و ورنا لیڈر بلاول بھٹو زرداری وزیراعظم گچین مریک وبلوچستان آن ہم پیپلز پارٹی نا جیالا اس وزیراعلی نا منصب آ تولک۔

(آن لائن)