سانفر پری پلان ئس، سیاسی مسخت کن کاریم اٹ اتنگا، اعظم خان

اسلام آباد : مسکوہی پرنسپل سیکرٹری اعظم خان چیئرمین تحریک انصاف نا برخلاف وعدہ معاف گواہ جوڑ مس‘ اعظم خان 164 نا بیان ءِ مجسٹریٹ نا مون آ ریکارڈ کرفے‘ 164 نا بیان اٹ چیئرمین تحریک انصاف نا برخلاف چارج شیٹ پیش کننگا‘ اعظم خان سائفر ءِ اسہ سجفوک ءُ سازش اس گوندا و پارے کہ سائفر نا حقیقت تون ہچ تعلقداری الو‘ سائفر نا راگ ءِ سیاسی مسخت کن کننگا‘ اعظم خان پارے کہ عمران خان کل راستکی تے ڈکسا سائفر نادروغ نا و بے بنداو بیانیہ جوڑ کرے‘ بے پتی ناتحریک آن بچفنگ کن سائفر ءِ پیشن نا سازش نا رنگ تس‘ عمران خان پارے کہ سائفر ءِ غلط رنگ ترسا الس نا بیانیہ ءِ بدل کیوہ۔ عمران خان 9 مارچ آ کنے آن سائفر ءِ ہلک و ولدا پدی خواہنگ آ پارے کہ ہمو سائفر گم مسنے‘ عمران خان سائفر نا راگ کرسا الس اٹ ملکی سلامتی ادارہ غاتا برخلاف بدبیسئی نا بج دسے‘ منع کننگ آن پد ہم اسہ سیکرٹ ءُ چٹھی اسے الس اٹ تینا جندی فائدہ کن تالان کرے‘سائفر ءِ رزاکا ملکی سلامتی ادارہ و امریکہ نا اواری پاننگا‘ سائفر نا راگ ءِ بیرہ تینا حکومت ءِ بچفنگ کن کرے۔ اعظم خان نا بیان نا اہم انگا ٹک آتا رد اٹ 8 مارچ 2022 آ سیکرٹری خارجہ محمد اعظم خان تون رابطہ کرے و سائفر نا بابت معلومدار کرے‘ ہرادے ہمو دے بیگہ نا اونا اُراغا راہی کننگا۔ سیکرٹری خارجہ اودے پارے کہ وزیر خارجہ قریشی مہالو آن عمران خان تون سائفر آ ہیت کرینے ہرادے عمران خان ہمودے آ پک کرے ہراتم محمد اعظم خان اودے سائفر ءِ تس۔ سائفر ءِ خنا عمران خان خوش مس و دا زبان ءِ US بلنڈر گوندسا پارے کہ داسہ اسٹیبلشمنٹ و اپوزیشن نا برخلاف بیانیہ تیار کننگ کن سائفر ءِ کاریم اٹ اتنگ مریک‘ عمران خان محمد اعظم خان ءِ دا ہم پارے کہ اپوزیشن ناکنڈآن بے پتی نا تحریک اٹ درملکی اوار مننگ ناکنڈآ لس مخلوق نا چکار ءِ کننگ کن سائفر ءِ کاریم اٹ اتنگ مریک۔ ہراکان گڈ عمران خان محمد اعظم خان ءِ پارے سائفر ءِ کنے ایتے ہرادے او اودے تس‘(کرپٹو دستاویزآتے تننگ کن پرمان و ضابطہ غاک ساڑی ءُ داڑے خلاف ورزی مسوسس)، اعظم خان نا رد اٹ سائفر کاپی ءِ عمران خان تین تون تخا و ایلو دے (10 مارچ 2022) ہراتم او اودے خواہس تو عمران خان ورندی تس کہ اوتو کنے آن گم مسنے(داڑے عمران خان نا ویڈیو کلپ اوار کننگ مریک ہراٹی او پاننگ ءِ کہ اودے سما اف کہ سائفر کاپی ہراڑکن ءِ)، محمد اعظم خان پک کرے کہ عمران خان اودے پاریسس کہ او دادے الس نا مون آپیش کیک و دا بیانیہ ءِ چپی راستی کرسا پیش کیک کہ ہندی شریدار آتا اواری اٹ درملکی سازش کننگ انگ ءِ۔ محمد اعظم خان عمران خان ءِ پارے کہ سائفر اسہ ڈکوک کوڈڈ دستاویزاسے‘ و دانا مواد آتے پاش کننگ مفک و اوکان گڈ وزیر خارجہ و سیکرٹری خارجہ تون باضابطہ اوڑدہی نا سلاہ تسٹ ہراڑے او MOFA نا کاپی آن سائفر ءِ خواننگ کیک (انتئے کہ عمران خان نا اصل کاپی داسکان گم ئس) و میٹنگ نا منٹس آن مستی فیصلہ کننگ مریک۔ 28مارچ 2022 آ دیوان بنی گالہ ٹی اڈہلک‘ ہراڑے سیکرٹری خارجہ وزارت خارجہ نا ماسٹر کاپی نا سائفر ءِ خوانا بنفے و دیوان نا کل شرہ وفیصلہ غاتیا سجفنگا و دا باندات ءِ بنجائی کابینہ نا مون آ تخنگ نافیصلہ کننگا۔ 30 مارچ 2022 آ کابینہ نا خصوصی دیوان اڈہلک ہراڑے وزارت خارجہ نا نمائندہ دوارہ سائفر ءِ خوانا و کابینہ ءِ بریفنگ تس داڑا ہم منٹ کننگا‘ دا باندات ءِ قومی سلامتی کمیٹی ٹی چست کننگ نافیصلہ کننگا‘مارچ 2022 آ قومی سلامتی کمیٹی نادیوان اڈہلک‘ ہراڑے ہندا عمل ءِ دوارہ کننگا و قومی سلامتی ڈویژن ناکنڈآن داڑا سجفنگا۔ محمد اعظم خان نا رد اٹ وزارت خارجہ غان دوئی مروک کل سائفر آک جے JS FSA (وزیراعظم نا دفتر اٹ وزارت خارجہ نا نمائندہ) ءِ پدی تننگانو ولے ہراتم او پرنسپل سیکرٹری ئس‘ وزیراعظم عمران خان نا گم کروک سائفر پدی کننگتو انتئے کہ عمران خان اودے گوہاسس و وار وار پاننگ آن پد ہم پدی کتو تے۔

(آن لائن)