کلبھوشن جادھو کن ولدا قونصلر رسینگ گیگ

اسلام آباد (مانیٹرنگ ڈیسک) بھارت پاکستان نا کنڈآن بھارتی جاسوس کلبھوشن جادھو ءِ قونصلر رسائی تننگ نا سلاہ آ امنا کرے۔ اسلام آباد اٹ بھارتی ناظم الامور گورو آہلووالیا دفتر خارجہ ءِ سرمس و بھارتی و پاکستانی سفارتی کمامدار آک کلبھوشن جادھو ءِ تننگ کن  قونصلر رسائی نا تفصیل آتے طے کریر۔  حوال نا رداٹ بھارت نا ناظم الامور گورو آہلووالیا کلبھوشن جادھو تون اوڑدہی کننگ اٹی ءِ،  قونصلر رسائی اسلام آباد ٹی رکھوک ہند آ تننگانے او قونصلر اوڑدہی کن کلبھوشن نا ساڑی گری نا ہند ءِ ڈکھوئی تخنگانے۔ حوال نا رداٹ کلبھوشن جادھو نا ساڑی گری نا ہند ءِ سب جیل پن کننگانے، کلبھوشن قونصلر اوڑدہی ٹی نظرثانی پٹیشن آ دستخط کیک۔ یات سلے کہ داکان مست  2 ستمبر 2019  آ ہم بھارتی قونصلر دہشت گردی نا دوبہ ٹی دزگیر بھارتی جاسوس کلبھوشن جادھو تون اوڑدہی کرینے۔ پاکستان نا کنڈآن کلبھوشن جادھو ءِ قونصلر رسائی جہانی عدالت انصاف نا فیصلہ نا رداٹ تننگاسُس او دا وخت انا بھارتی ڈپٹی ہائی کمشنر گورو آہلو والیا کلبھوشن تون اوڑدہی کریسُس ہرا دے انا 12 بجہ غا بنا مس او اِرا گھنٹہ اسکان برجا سلیس، اوڑدہی ٹی پاکستانی کمامدار آک ہم ساڑی ئسر۔ دا رد اٹ دفتر خارجہ نا کنڈ آن جاری کروک بیان اٹی پاننگانے کہ بھارت نا درخواست آ کلبھوشن جادھو ءِ ارٹمیکو وار قونصلر رسینگ گیگ تننگانے، دکان مست 2 ستمبر 2019ء نا دے ہم ویانا کنونشن نا رد اٹ قونصلر رسینگ گیگ تننگاسس، دفتر خارجہ نا رد اٹ بھارتی ہائی کمیشن نا اِرا قونصلر آفیسر ءِ اسلام آباد اٹی پیشیم نا 3 بجہ غا کلبھوشن جادھو تون بیدس توننگ آن اوڑدہی نا موکل تننگا۔ دفتر خارجہ نا رد اٹ پاکستان 17 جولائی 2019ء نا جہانی عدالت انصاف نا فیصلہ غا پورو آن پورو عمل کننگ کن سنبرینگوک ءِ۔ و اومیت کیک کہ بھارت ہم دا رد اٹ پاکستان تون کمک کیک۔