بجٹ اٹ کورونا نا توننگ کن بھلو فنڈ اس تخنگانے، جام کمال خان

پشین (خ ن) وزیراعلیٰ بلوچستان جام کمال خان پارینے کہ اینخو نا مالی سال نا بجٹ اٹ جانجوڑی بشخ انا جوانی و کووڈ۔19 نا چیلنج تون مون تننگ کن بھلو کچ اٹی فنڈ اس جتا کننگانے ہراڑان بھلا شار تا ہسپتال آتیٹی دارو درمان نا پُوسکن آ آسراتی تے تننگک، سالانہ شونداری پروگرام اٹ کل ضلع غاتا گرج آتا رداٹ بھلو بھلو شونداری ڈٹ اوار کننگانے، ہر ضلع ٹی روڈ، ہسپتال، تعلیمی ادارہ، دیر و ایلو بشخ آتا ڈٹ آتیکن فنڈ جتا کننگانے، ہندا ڈٹ آتا پوروی آن ضلع غاتے جوان بنداو آ شونداری ممکن مریک، دا خیال آتا درشانی ءِ او قبائلی کمامدار، بلوچستان عوامی پارٹی نا ضلعی کمامدار و زندگی نا جتا جتا بشخ آتیان تعلق تخوک آ بندغ آتا ڈل اتون ہیت وگپ کرسا کرے، صوبائی وزیرک میر ضیاء لانگو، میر ظہور بلیدی، محمد خان لہڑی، پارلیمانی سیکرٹری ماہ جبین شیران و بشریٰ رند ہم او وخت آ ساڑی ئس۔ ڈل آتا کنڈآن ضلع پشین اٹ بھلو کچ اسے ٹی جتا جتا بشخ آتیٹی برجا انگا شونداری ڈٹ آتیا وزیراعلیٰ نا منتواری ءِ ہرفسا پاننگانے کہ دا اولیکو صوبائی حکومت ءِ ہرا سیاسی و ایلو اختئی تے آن اینگ مرسا ضلع پشین اٹ شونداری ڈٹ آتا شار اس جوڑ کرینے۔