پی ایس ایل 5 ”کرونا وائرس“ نا گواچی

کراچی (مانیٹرنگ ڈیسک) نیشنل اسٹیڈیم ہننگ نا وخت آ پیشن منہ مار ئِ دوتے ٹی ٹکٹ آتے ہلوک تینا فیورٹ ٹیم نا شرٹ بینوک سلوک ئسر، تو گاڈی ئِ تورسا اوفتا فوٹو تے ہلکر، اوفتے آن اسٹ اس کنے دا پارے کہ ای ورندی تسٹ کہ کل ننا رکھ اکن مننگ اٹی ئُ، اُرا غا ہنبو میچ ئِ آرام اٹ ہبو، اسٹیڈیم اٹ ہم ہر کنڈ آ ویرانی ئس۔ لفٹ اٹ اسہ بھارتی ٹی وی کریو باسک اسے آن ہرفنگا کہ نمے کرونا وائرس نا خلیس اف تو اوفک ورندی تسر کہ ” کرونا ننا ملک اتون اوار مچ آ دنیا ٹی تالان ئِ ہراڑے ہراڑے تینے بچف، بس پام کننگ اٹی اُن“ میڈیا سینٹر تے ٹی صحافی تا کچ ہم بھاز کم محسوس مسر، ملتان سلطانز و پشاور زلمی نا میچ اٹ 24 فور او ہشت 6 خلکر، 14 پلیئر آو¿ٹ مسر، ولے اسٹیڈیم اٹ بھاز چُپی ئس، داکان مست ہر باونڈری یا وکٹ تمنگ آ بھاز شور مسکہ اوفک اسل بیان مفسہ۔ میڈیا سینٹر ساونڈ پروف مریرہ ولدا ہم کاریم نا وخت آ اگہ بندغ لیپٹ ٹاپ کاریم اس کریکہ تو ہراتم باو¿نڈری یا کس اس آو¿ٹ مسکہ تو اُلس نا مچی نا شیدائی تا توار آن سما تماکہ کہ باو¿نڈری اس یا کس اس آو¿ٹ مسنے۔ ولے داسہ دہن مننگ اٹی اف، زند اٹ اولیکو وار خالی ئُ اسٹیڈیم اسے ٹی بھلو میچ اس کور کننگ آ پین وڑ لگک۔ پاکستانی گراو¿نڈ آتا رونق آک بھلو سختی تے آن پد بحال مسنو ولے بدقسمتی آن پی ایس ایل ہم ”کورونا وائرس“ نا گواچی مس۔ دا جہانی ئُ دَین اسے او مچ آ دنیا ٹی اسپورٹس ایونٹس دانا سوب آن منسوخ کننگانو، ولدا ہم دا وخت اسکان پام کننگ المی ئِ۔ پی سی بی مالو آن کنفیوڑن نا گواچی خننگاکہ، او میچ آتے پروگرام نا رداٹ کرفنگ نا فیصلہ کرے، اگہ سندھ حکومت داوڑ پاریسس کہ نم پاننگ کیرے کہ دا جوان اف، مچ آ دنیا نا اسٹیڈیم تے ٹی شیدائی تا پترینگ انگ بند ئِ ولے داڑے بھلو خلیس اسے آن پد کراچی کنگز و لاہور قلندرز نا میچ ئِ کرفنگا، پاکستانیک کرکٹ تون ہنداخس مابت کیرہ کہ خلیس آن پد ہم ہزار آ شیدائیک اسٹیڈیم آ بسر، ولدا تینا رد آن سبخ ہلسا ایلو دے آ میچ آتے بند اسٹیڈیم تے ٹی کرفنگ نا بنا ئِ کریر۔ در ملکی گوازی گرتا ہننگ آن پد پی ایس ایل نا رونق آک مالو نا وڑ اٹ سلتوس، داسہ تو دا بنجائی ٹی ٹوئنٹی کپ آمبار محسوس مننگ اٹی ئِ، ٹی وی آ میچ ئِ ہروک آک ہم ہندا خواست ئِ کننگ اٹی ئُ کہ ہچ مزہ بننگ اٹی اف، گوازی گرک ہم خالی گراو¿نڈ آتے ٹی پرفارمنس نا ستائی ملپننگ آ فریشان اریر، ولے ساڑی حالیت آتے ٹی کس اس ہم ہچ اس کننگ کپک۔ اگہ لیگ ئِ توننگاکہ تو شاید دا جوان مسکہ ولے ہچ خبر اف کہ ساڑی حالیت آک ہراتم اسکان برجا سلر۔ ہندن لگک کہ ہندا سوچ آن پد زو زو کرسا ایونٹ ئِ چٹفنگ نا فیصلہ کننگا، داسہ تو ہندن لگک کہ بیرہ رسمی کارروائی تے پورو کننگ انگ ئِ۔