وزیراعلیٰ بلوچستان جام کمال نا فاطمہ جناح چیسٹ اینڈ جنرل ہسپتال نا دورہ

0

Get real time updates directly on you device, subscribe now.

کوئٹہ (خ ن) وزیراعلیٰ بلوچستان جام کمال تدوک آ دے بیگہ تون فاطمہ جناح چیسٹ اینڈ جنرل ہسپتال نا دورہ ئِ کرے و آئسولیشن وارڈ، آئی سی یو و پبلک ہیلتھ لیبارٹری نا جاچ ئِ ہلک۔ ہسپتال نا میڈیکل سپرنٹنڈنٹ وزیراعلیٰ ئِ آئسو لیشن وارڈ اٹی تروک آسراتی تا بابت بریفنگ تِس او پارے کہ آئسو لیشن وارڈ اٹی کرونا وائرس آن زہمی درمان مروک چنا تا حالیت مہالو آن جوان ئِ، و زہمی چنا تا رکھ و سبھال ئِ کننگ انگ ئِ۔ ایم ایس ہسپتال حوال تس کہ آئسولیشن وارڈ اٹی 5 وینٹیلیٹر تون اوار غٹ گرج انا آسراتیک ساڑی اریر۔ وزیر اعلیٰ آئی سی یو ٹی درمان مروک جونین نا ناجوڑ آتا جانپڑسی ئِ کرے و پبلک ہیلتھ لیبارٹری نا جاچ ئِ ہم ہلک۔ اودے پاننگا کہ لیبارٹری ٹی کرونا و کانگو وائرس و ایلو دَینی آ ناجوڑی تا ٹیسٹ آتا پوسکن آ آسراتیک اریر۔ وزیراعلیٰ ہسپتال اٹی کرونا وائرس کن جوڑ کروک آئیسولیشن وارڈ و ایلو ناجوڑ آتے کن طبی آسراتی و سفائی نا حالیت آ است جمی نا درشانی کرے۔ و پارے کہ ہسپتال نا ودفنگ و طبی آسراتی تیٹی ودکی کن گام گیج کننگک۔ وزیراعلیٰ د اوخت آ ڈاکٹر و طبی کارندہ غاتتون ہیت و گپ کرسا پارے کہ کرونا وائرس نا توننگ کن کاریم کروک ڈاکٹر و طبی کارندہ غاتا خذمت آک ستا کڑزرہ۔ وزیراعلیٰ آئسولیشن وارڈ و کرنٹائن اٹ تعینات ڈاکٹر و طبی کارندہ و انتظامی افسر آتا کارکڑد نا ستا ئِ کرسا پارے کہ ہرا جوزہ و سِخت اٹ ڈاکٹر، طبی کارندہ و انتظامی افسر آک کرونا وائرس نا توننگ کن تینا زموری تے سر تننگ ئُ، انشاءاللہ نن تینا مسخت اٹ امر کہ مرے سرسہب مرینہ۔ او پارے کہ الس ہبکہ مننگ نا جاگہ غا پاریزی ڈٹ ڈَول آتے دوئی کرسا حکومتی گام گیج آتتون کمکار مرے۔ وزیراعلیٰ ئِ دا وخت آ جانجوڑی سیکرٹری مدثر وحید معلومدار کرے کہ پی سی ایس آئی آر لیبارٹری ٹءجوڑ کرنٹائن اٹی سڑی زائر آتا ٹیسٹ برجا ئِ۔ وخت اس کہ ڈی جی پی ڈی ایم عمران زرکون پارے کہ وزیراعلیٰ نا پارت ئِ مون آ تخسا زائر آتا آسراتی تیٹیو دکی کننگانے، و اوفتا ویل آتے اولیت نا بنداو آ ایسر کننگ انگ ئِ۔

Get real time updates directly on you device, subscribe now.

Leave A Reply

Your email address will not be published.