بلاول مستین نا بھلا جماعت ءِ لاڑکانہ اسکان کچ اٹ کرے، شبلی فراز

اسلام آباد(آن لائن) بنجائی وزیر حوالکاری ونشریات سینیٹر شبلی فراز پارینے کہ بلاول بھٹو زرداری سیاسی وڑاٹ اُست ہسونی نا گواچی ءِ، او مالو نا اسہ بھلو جماعت اسے لاڑکانہ اسکان تورینے۔ وزیراعظم عمران خان آ وڈی خوری نا دوبہ خلنگ آن مست اودے 10 وار سوچائی ئس، بلاول بھٹو سٹی ءُ ہیت کننگ نا جاگہ غا تینا خاہوت آ مروک آ سوج آتا ورندی ءِ ایتے۔ تدوک آ دے چیرمین پیپلز پارٹی نا پریس کانفرنس نا ورندی ٹی ہیت کرسا بنجائی وزیر اطلاعات تینا ویڈیو بیان اٹ پارینے کہ بلاول بھٹو زرداری تینا پریس کانفرنس اٹ بھاز پین وڑ ءُ بولی اس کاریم اٹ ایسنے۔ وزیراعظم عمران خان و اونا ایڑھ نا بارواٹ ہیت آک اوڑتون زیب کپسہ۔ وزیراعظم نا ایڑھ نا سیاست تون ہچ ءُ تعلق اس اف۔ نیاڑی سے نا بارواٹ داوڑ نا ہیت آک بھاز خراب ءُ حرکت ءُ۔ بلاول بھٹو زرداری ہمو گڈیکو بندغ ءِ ہرا عمران خان آ وڈی خوری نا دوبہ خلکنے۔ عمران خان ءِ کس اس مسٹرٹین پرسنٹ پارے و نہ اونا ایڑھ نا بابت کس اس ہیت کرے۔ بلاول بھٹو زرداری نا دوبہ غاتا مذمت ءِ کینہ۔ بلاول بھٹو داوڑ نا ہیت کپ او یا تو خاچنگ آن بش مسوسُس یا تو ڈغار نا راستکی تیان ناپہہ ءِ۔ اونا کمکار آک اودے ہچ اس پہہ کتنے۔ داوڑ نا ہیت کرسا بلاول تینے آ کل ءِ مخفینے۔ او مالو نا اسہ بھاز بھلو پنی ءُ پارٹی اسے بیرہ لاڑکانہ اسکان محدود کرینے۔ شبلی فراز مستی پارینے کہ بلاول بھٹو زرداری سیاسی وڑ اٹ اُست ہسونی نا گواچی ءِ۔ اوڑتون ہچ ءُ سیاسی ءُ ایجنڈا اس اف۔ ہندا سوب آن او داوڑ نا ہیت کننگ اٹی ءِ۔ عمران خان آ وڈی خوری نا دوبہ خلنگ آن مست بلاول بھٹو زرداری ءِ 10 وار سوچائی ئس، او سٹی آ ہیت آتا جاگہ غا تینا خاہوت آ ہرفوک آ سوج آتا ورندی ءِ ایتے۔