آیا صوفیہ نا اسہ وار ولدا عبادت کن مَلنگ ترکی نا جند انا ویل اسے‘طیب اردوان

انقرہ (آن لائن) ترکی نا صدر رجب طیب ایردوان پارینے کہ آیا صوفیہ نا بابت پک انگا فیصلہ نا حق بیرہ ترک حکومت ءِ دوئی ءِ۔ ایلو ملک آتا کاریم بیرہ دا فیصلہ نا احترام ءِ کننگ ءِ۔ در ملکی خبر رساں ادارہ نا رداٹ تینا اسہ انٹرویو سے ٹی صدر اردوان پارینے کہ آیا صوفیہ ہمو جاگہ ءِ کہ ہراڑے فتح استنبول آن پد فاتح سلطان مہمت خان اولیکو جمعہ نماز ءِ ادا کرے و اودے سرسہبی نا نشانی سے نا وڑاٹ مسیت اسے ٹی بدل کرے۔ ہندا سوب آن راج انا ذہن و اُست اٹ دا جاگہ نا بھاز بھلو ہند اسے۔ او پارینے کہ 1934 ٹی آیا صوفیہ نا عجائب گھر ٹی بدلی نا فیصلہ ملت نا اُست ءِ ہسون کرے۔ دا ہند انا تینا درستی راستی نا وڑاٹ پدی بننگ المی ئس۔ او پارینے کہ ریاستی مجلس شوریٰ اودے پیش کروک آ درخواست نا حتمی فیصلہ ءِ بنفینے۔ آیا صوفیہ نا حیثیت نا بابت پک انگا فیصلہ نا حق پین کس اسے اف بیرہ ترک ملت ءِ دوئی ءِ۔ دا ننا جند انا ویل اسے۔ ایلو ملک آتے کاریم بیرہ دا فیصلہ نا احترام کننگ نا ءِ۔ لیبیا نا سیاسی کاختی آ ہیت کرسا او پارینے کہ کوزہ گیر حفتر و اونا مخ تف آتا کوزہ پلان سرسہب مننگ کتو۔ ترکی و لیبیا نا نیام اٹ سمجھوتہ ءِ یات ترسا او پارینے کہ دا سمجھوتہ نا طفیل ترکی نہ بیرہ دے ٹکی بحرِ روم اٹ تینا حق و مفاد آتے ضمانت اٹ ہلکنے وخت اس کہ لیبیا ٹی تینا ایلم تتون کمک کرینن۔ صدر اردوان پارینے کہ سیاسی و اقتصادی وڑاٹ لیبیا نا سوگوی قطبی افریقہ و یورپ ہڑتوم آتے جوان مریک۔