جولائی آن چنکو کچ اسے ٹی پولیو مہم بنا کیک،8 لکھ چنا ءِ پڑی کنفرہ

اسلام آباد (اے پی پی) کورونا دین انا سوب آن چار تُو آن پد 20 جولائی آن چنکو کچ اسے ٹی دُوارہ پولیو مہم بناکننگ ءِ، دا رد اٹ فیصل آباد، اٹک، سویلی وزیرستان نا ضلع غاتیان بیدس کراچی و کوئٹہ نا خاص ضلع غاتیٹی پنچ سال آن کم وئی نا 8 لکھ چناتے انسداد پولیو نا پُڑی کنفنگک۔ وزارت جان جوڑی و گلوبل پولیو وریڈیکشن انیشی ایٹیو(جی پی ای آئی ) نا پارت آتے مون آ تخسا پاکستان پولیو پروگرام غٹ مہم آتے پدی بٹیسس وپروگرام ءِ کورونا دین انا گچین چاروکی نا زمواری تننگا۔ پاکستان انسداد پولیو پروگرام مچ آ پاکستان آن گچین وڑاٹ کورونا، پولیو و ایلو ناجوڑی تا چاروکی ءِ کرے، لاک ڈاون، اوپی ڈی نا بند مننگ و ہن و بر نا آسراتی تا مفننگ نا سوب آن ناجوڑی تا انسداد نا مہم آک مننگ کتوس۔ اسہ کساس اسے نا رداٹ ماہانہ اوسط ہفت لکھ چنکاچناتے المی ویکسین تننگ نا چرجوئی زہمی مس وخت اس کہ ایلو کنڈآ اُرااُراغا ہنسا مہم زہمی مننگ آن چناتیٹی قوت مدافعت نا ویل ودی مس، دسمبر 2019ءو مارچ 2020ءاٹی سرسہب پولیو مہم آتے چلیفنگ آن پد مہم مفننگ نا سوب آن خراب ءُ زہم اس تما۔ ہنداخاطرآن ڈبلیو پی وی ون و ٹائپ ٹو وائرس نا ودنگ نا رسک ودانے۔ وزیراعظم نا خصوصی کمکار جان جوڑی ڈاکٹر ظفر مرزا پارینے کہ ”کورونا دین انا ننا زرگزران آ بھلو زہم اس تمانے، پولیو مہم آتا مفننگ نا سوب آن چناتے پولیو وائرس نا خطرہ مون تروک ءِ، ننے داسہ ساڑی وخت اٹی کورونا تون مننگ نا گرج ءِ، ای غٹ لمہ وباوہ غاتیان خواست کیوہ کہ او تینا چناتے مچ آ وئی نا معذوری آن بچفنگ کن انسداد پولیو نا پڑی ضرور کنفر۔ چناتا گچین جان جوڑی ننا اولیت ءِ۔ دُوارہ پولیو مہم نا بنانا ڈٹ بندی صوبہ غاتون تین پہ تینی سلابت اٹ ترتیب تننگا و جون نا تُو اٹی باقاعدہ پولیو نا ٹیکنیکل ایڈوائزری پڑک آن منظوری ہلنگا، ڈٹ بندی نا رداٹ اگست و ستمبر اٹی خاص علاقہ غاتیٹی و 2020 اٹی مسہ قومی مہم آتے چلیفنگ نا حکمت عملی اس جوڑ کننگانے، وزیراعظم عمران خان نا کماشی ٹی مروک آ 4 جولائی آ نیشنل کمانڈ اینڈ کنٹرول نا دیوان اٹی دُوارہ پولیو مہم نا بناءِ کننگ نا فیصلہ نا ستاءِ کننگا، دادیوان اٹی غٹ صوبہ غاتا چیف سیکرٹریک ہم بشخ ہلکوسر۔ کوارڈینیٹر قومی ایمرجنسی آپریشنز سینٹر ڈاکٹر رانا محمد صفدر پارے کہ اول ہمو علاقہ غاتیٹی مہم ءِ چلیفنگ انگ ءِ ہراڑے وائرس زیات ءِ۔ دا مہم کن کورونا دین انا سوب اسٹاف ءِ خصوصی تربیت تننگانے۔ اومستی پارے کہ اُرااُراٹی مروک آ مہم اٹی کورونا نا بارواٹی آگاہی ہم تالان کننگک۔ راج انا غٹ مکتبہ فکر و خصوصی وڑاٹ لمہ و باوہ مہم نا سرسہبی ٹی تینا کڑد ءِ ادا کیر۔