سمندری طوفان نا ترندی مچٹ شیف تما، گڑتی و خلیس نا گمانک ساڑی

طوفان کراچی آن 470 کلومیٹر سویل، ٹھٹھہ غان 460 کلومیٹر سویل و اورماڑہ غان 570 کلومیٹر سویل دے ٹک اٹی ءِ

0

Get real time updates directly on you device, subscribe now.

اسلام آباد: سمندری طوفان بپر جوائے نزور مرسا کیٹیگری 3 انا ”بے کچ ترند سمندری طوفان” اٹی بدل مسنے۔ دا طوفان کراچی آن کم و ود 470 کلومیٹر سویل، ٹھٹھہ غان 460 کلومیٹر سویل و اورماڑہ غان 570 کلومیٹر سویل دے ٹک اٹی ساڑی ءِ۔ نیشنل ڈیزاسٹر مینجمنٹ اتھارٹی نا کنڈآن سے شنبے نا سہب اتون جاری کروک سرجم حوال آتا رداٹ سمندری طوفان نا کہول آ چلینگ انگ نا رفتار کم وود 150-140کلومیٹر فی گھنٹہ وخت اس کہ اونا مرکز نا گردیہ رفتار 170کلومیٹر فی گھنٹہ اسکان ءِ۔ تازہ انگا پیشن گوئی نا رداٹ طوفان نا برقرار سلنگ نا گمان ءِ۔ 14 جون 2023 نا سہب اسکان دانا رخ قطب انا کنڈا و ولدا دے ٹک نا کنڈا مننگ نا گمان ءِ۔ داکان بیدس 15 جون 2023نا بیگہ نا وخت آ اسہ بے کچ ترند ءُ طوفان اسے نا وڑاٹ کیٹی بندر (سویل دے ٹکی سندھ کوسٹ لائن) و بھارتی گجرات نا کرکی پٹی نا نیام اٹ ڈوک لگنگ نا گمان ءِ۔ طوفان آن گمانی وڑاٹ ٹھٹھہ، بدین، سجاول، تھرپارکر، کراچی، میرپور خاص، عمرکوٹ، حیدرا ٓباد، اورماڑہ، ٹنڈواللہ یار خان و ٹنڈومحمد خان نا علاقہ زہمی مننگ نا گمان ظاہر کننگانے۔ داکان بیدس بنجائی وزیر تخفیف نیزگاری و راجی آسراتی شازیہ عطامری پارینے کہ سمندری طوفان نا رداٹ سندھ حکومت 80 ہزار آن اسہ لکھ بندغ ءِ رکھ ہند آتیا گدریفینے، صوبائی حکومت الس نا جان و مال انا رکھ اکن پبی گام گیج کننگ ءِ، ولے اوفک تینا رکھ اکن تینٹ ہم گچین رکھی گام گیج کیر۔ سے شنبے نادے آ قومی اسمبلی ٹی گپ وتران کرسا شازیہ مری پارے کہ پاکستان ءِ سمندری طوفان آن بھاز خطرہ ءِ، نن دا سوچ بچار اٹی اُن کہ ہراوڑ مخلوق نا جان و مال انا رکھ ءِ پک کننگے، سندھ حکومت پبی گام گیج کننگ اٹی ءِ۔ اوپارے کہ سمندری طوفان آن بدین و ٹھٹھہ ءِ خطرہ ءِ، کراچی شار اٹی طوفان نا خطرہ نا رداٹ بل بورڈز آتے اینک کننگ نا کاریم برجاءِ 14 و 15 جون آ بھاز خطرہ مون تروک ءِ۔ اوپاریکہ مخلوق حکومتی پارت آتیا عملدرآمد ءِ پک کے، سندھ حکومت 80 ہزار آن اسہ لکھ بندغ ءِ رکھ ہند آتیا گدریفینے، الس تینا جان و مال انا رکھ اکن تینٹ ہم رکھی گام گیج کے۔ اوپارے کہ سمندری طوفان آن بلوچستان ءِ ہم خطرہ ءِ، اسپیکر ہم مخلوق ءِ حکومتی پارت آتیا عملدرآمدنا پارت کے۔

(اے پی پی)

Get real time updates directly on you device, subscribe now.

Leave A Reply

Your email address will not be published.