گچین کاریک وخت آ مریرہ، گچین کاری مہم نا بناءِ کرینن، مریم اورنگزیب

لاہور : حوالکاری وشینکاری نا بنجائی وزیر مریم اورنگزیب پارینے کہ ملک اٹ گچین کاریک تینا وخت آمریرہ۔ مسلم لیگ (ن) تینا گچین کاری مہم نابناءِ کرینے۔ نوازشریف گچین کاری تیان مست پاکستان آبریک۔ گچین کاری تے ٹی گمانی سیوت نافیصلہ ءِ ہمو وخت آ کننگک‘ 9 مئی نا واقعہ غاتا زموار تے اوفتا کروک آتا سزا تننگک، پی ٹی آئی حکومت بننگ تون اپوزیشن ءِ جیل اٹ بند کرے‘ دروغ نا مقدمہ جوڑ کننگا‘ صحافی و میڈیاورکر آتے ہیلتھ انشورنس و ر یلیف فراوان کننگک۔ ساڑی حکومت صحافی و میڈیا ورکر آتا رکھ اکن بل ایسنے‘ بجٹ اٹ کم آن کم 32ہزار روپئی تخنگانے۔لاہور اٹ میٹ دی پریس آن تران کرسا مریم اورنگزیب پارے کہ پی ٹی آئی دور اٹ صحافی ومیڈیا ورکر آتیا بیداد کننگا میڈیا غا رکھ خلنگا‘ساڑی حکومت صحافی و میڈیا ورکر تا رکھ اکن بل ایسنے‘ پی ٹی آئی دور اٹ میڈیا سنسر شپ نافذ کننگاسس‘اوپارے کہ پی ٹی آئی نا دور اٹ پارلیمنٹ اٹ اپوزیشن ءِ ہیت کننگ ناموکل الوکہ۔ تینا ہیت آتے الس اسکان سر کننگ کن اپوزیشن ءِ بیرہ پریس کلب اٹ ہیت کننگ نا وارخواہی رسینگاکہ۔ مریم اورنگزیب پارے کہ مسلم لیگ (ن) سختی نا دے تے ٹی الس نا آسراتی کن گچین ءُ بجٹ اس پیش کرینے‘ بجٹ اٹ کم آن کم اجرت ءِ 32ہزار روپئی تخنگانے کم آن کم اجرت نا کانود ءِ نافذ کننگ کن کل المی گام گیج آتے کننگک۔ او پارے کہ نوکاپ آن پد ہم دا سال خولم نا ریکارڈ پیداوار دوئی مسنے‘ بزغر آتے سبسڈی و ریلیف تننگ کن ہم ساڑی حکومت گچین گام گیج کرینے‘ حوالکاری وزیر پارے کہ گچین کاریک تینا وخت آ مریرہ‘ مسلم لیگ (ن) تینا گچین کاری مہم نابناءِ کرینے‘ حکومت نا آئینی مُد اگست اٹ پورو مریک اگست اٹ آئینی مُد اناپورو مننگ آن پد نگران سیٹ اپ بریک۔

(آن لائن)