پاکستان بھارت نا کنڈ آن مقبوضہ کشمیر اٹی جی 20 دیوان آ ترند

اسلام آباد : پاکستان بھارت نا غیرکانودی وڑاٹ کوزہ ٹی جموں وکشمیر نا دارالحکومت سری نگر اٹی 22 آن 24 مئی آ جی 20 ٹورازم ورکنگ ٹولی نا دیوان اس اڈتننگ نا بھارت نا فیصلہ غا شدید ردعمل نا درشانی ءِ کرینے۔ دفترخارجہ نا ترجمان نا کنڈآن سے شنبے نادے آ جاری بیان اٹی پاننگانے کہ ورناتا امور آ اسہ سلابتی فورم (وائی 20) نا بھارت نا غیرکانودی وڑاٹ کوزہ ٹی جموں وکشمیر اٹی اِر اپین دیوان تا لیہہ و سری نگر اٹی شیڈول ہم ہنداخس ہی فریشان کن ءُ۔ ترجمان تینا بیان اٹی پارے کہ بھارت ناغیرزموارانہ گام اقوام متحدہ نا سلامتی کونسل نا قرارداد و اقوام متحدہ نا چارٹر و جہانی کانود نا اصول آتا پاش آن پاش خلاف ورزی ءِ و دا بھارت نا کنڈآن جموں وکشمیر آ تینا غیرکانودی کوزہ ءِ برقرار تخنگ نا تازہ انگا گام گیج آتا کڑی اسے۔ ترجمان پارے کہ پاکستان دا گام گیج آتا ترندی اٹ مذمت ءِ کیک، داوڑنا گام گیج آک جموں وکشمیر ناحقیقتءِ ڈکھنگ کپسہ ہراکہ اسہ جہانی کہو ل آ امنا مروک جھیڑہ اسے، ہرا اقوام متحدہ نا سلامتی کونسل نا ایجنڈاغا ہفت دہائی آن زیات وخت آن ساڑی ءِ۔ بیان اٹی پاننگانے کہ نئے داوڑنا سرجزآک مقبوضہ علاقہ نا آبادیاتی ساخت ءِ بدل کننگ نا غیرکانودی کوشست آتون اوار بھارت ناغیرکانودی وڑاٹ کوزہ ٹی جموں وکشمیر نا مخلوق آ بھارت نا وحشیانہ جور اٹ جہانی برادری نا چکار ءِ اینک کننگ کیک۔ بیان نا رداٹ بھارت نا غیرکانودی وڑاٹ کوزہ ٹی جموں وکشمیر اٹی جی 20 ایونٹ آتا مہمانداری ءِ کننگ نا تینا فیصلہ اتون بھارت اسہ وار ولدا اسہ اہم ءُ جہانی ٹولی اسینا تینا رکنیت نا فائدہ ہرفنگ ءِ تانکہ تینا ایجنڈا ءِ مون آ دننگ مرے۔ بیان نا رداٹ اسہ ہندن ءُ ملک اسے کن ہرانا تینا بارواٹ و دنیا ٹی تینا ہند انا بارواٹی شاندار نظریہ سے، بھارت اسہ وار ولدا دا پک کرینے کہ او جہانی برادری نا زموار باسک اسے نا وڑاٹ کاریم کپننگ ءِ۔

(اے پی پی)