پدریسہ مسہ دے نا واقعہ غاتیان پد وزیر داخلہ بلوچستان نا کماشی ٹی اہم دیوان

کوئٹہ: وزیرداخلہ بلوچستان میر ضیاء اللہ لانگو ناکماشی ٹی امن وایمنی نا بابت اہم ءُ دیوان اس اڈہلک‘ دیوان اٹ ایڈیشنل چیف سیکرٹری داخلہ صالح ناصر، ایڈیشنل آئی جی پولیس سلمان چوہدری، ڈی جی لیویز، ڈی آئی جی پولیس عظیم شہاب لہڑی، ایڈیشنل ڈپٹی کمشنر کوئٹہ و ایلو تعلقدار کمامدار آک بشخ ہلکر‘ دیوان اٹ ایڈیشنل چیف سیکرٹری داخلہ و ایڈیشنل آئی جی پولیس دیوان نا شریدار آتے جم بریفنگ تسر۔ دیوان اٹ شہید آتیکن دعا پاتیہ ہم کننگا‘ دیوان نا شریدار آتے صوبہ ٹی امن وایمنی نا پوسکن آ حالیت آتیا بریفنگ تننگا‘ دیوان نا شریدار آتے دہشت گردی نا واقعہ غاتا توننگ کن کانود نافذ کروک ادارہ غاتا گام گیج آتیان معلوم کننگا‘ بریفنگ اٹ پاننگا کہ گدرینگوک آ اِرا دے اٹ دا وخت اسکان صوبہ ٹی دہشت گردی نا چار واقعہ مسنو‘ بریفنگ اٹ پاننگا کہ واقعہ غاتے ٹی گیشتری کانود نافذ کروک ادارہ غاتے شست کننگا وخت اس کہ کانود نافذ کروک ادارہ غاتا وخت آ کارروائی ناسوب آن دہشتگردی نا درجن نا کچ ڈٹ آتے بے سہب کننگا‘ دیوان اٹ یوم علی نا وخت آ فل پروف سیکورٹی فراوان کننگ ناپرمان کننگا‘ دیوان نا شریدار آتیان وزیر داخلہ میر ضیاء اللہ لانگو پارے کہ کارندہ غاتیا جلہو نا ڈٹ بندی تے بے سہب کننگ کن پین پبی ءُ کڑد اس ادا کروئی تمک وخت اس کہ صوبائی حکومت دا مسخت کن اولیتی بنداو آ وسیلہ فراوان کیک‘ وزیرداخلہ مستی پارے کہ پولیس کارندہ غاتے دہشتگردی نا جلہو تیان بچفنگ کن کل المی و پوسکن آ ازباب آتے فراوان کننگے۔

(خ ن)