قومی اسمبلی نامتکن آ ماڑی ءِ قومی میرات گوندنگ نا قرارداد منظور

اسلام آباد : قومی آئینی کنونشن اٹی آئین پاکستان نا بانی تے خراج تحسین پیش کننگ و قومی اسمبلی نا متکن آ ماڑی (سٹیٹ بینک بلڈنگ) ءِ قومی میرات گوندنگ نا قرارداد آک امنائی وڑاٹ منظور مسر۔ آئین نا بانی، آئین نا تدوین کن جوڑ کمیٹی و آئین سازی ٹی بشخ ہلوک آ بندغ آتے خراج تحسین و عقیدت پیش کننگ نا قراراد اس رضاربانی پیش کرے۔ اوپارے کہ گولڈن جوبلی نا وخت آ قومی آئینی کنونشن نا بشخ ہلوک آئین نا بانی تے خراج عقیدت پیش کیک۔ آئین پاکستان گل زمین پاک انا سپریم لاء ءِ ہراٹی واکداری تا بشخنگ نا وضاحت ءِ سرجمی اٹ کننگانے۔ قرارداد اٹی 1973 نا آئینی کمیٹی ءِ خراج عقیدت پیش کننگانیو پاننگانے کہ مسکوہی وزیراعظم ذوالفقار علی بھٹو و کمیٹی نا باسک آک جمہوریت، انسانی حق و کانود نا حکمرانی کن پبی وڑاٹ کاریم کریر۔ قرارداد اٹی پنچ می قومی اسمبلی نا باسک و آئینی کمیٹی ءِ آئین پاکستان نا تدوین آ ہم مبارکبادی پیش کننگانے و پاننگانے کہ دا کنونشن آئین نا بانی تا ستاءِ کیک ہرافک وژن، عزم و ہمت اٹ کاریم کرسا اسہ مشکل ءُ کاریم اسے ممکن کریر قراردادا ٹی مسکوہی وزیراعظم ذوالفقار علی بھٹو، اسپیکر فضل الٰہی چوہدری، عبدالحفیظ پیرزادہ، خان قیوم خان، میاں ممتاز دولتانہ، سردار شوکت حیات، خان عبدالولی خان، مولانا مفتی محمود و شاہ احمد نورانی نا خذمت آتے ہم خراج تحسین پیش کریر۔ قرارداد اٹی آئین شکنی و اودے معطل کروک آ بندغ آتا مذمت ءِ کننگانے۔ وزیر خزانہ قومی اسمبلی نا متکن آہال (اسٹیٹ بینک بلڈنگ) ءِ قومی میرات گوندنگ نا قرارداد پیش کرے ہرانا منظوری ءِ تننگا۔ قرارداد نا متن اٹی پاننگانے کہ قومی اسمبلی ہال 1972 آن مئی 1986 اسکان زیر استعمال ئسک، دا اسمبلی ہال انا ملکی تاریخ اٹی اسہ ہند اسے، دا ہندن ءُ جاگہ اس ئس ہراڑے آئین سازی نا مچ آ کاریم پورو مسنے۔

(اے پی پی)