پارلیمنٹرین آتے ہر سیم و دنگ آن ایڑتر مروئی تمک، اسپیکر قومی اسمبلی

جمہوریت، امن، انسانی حق وپائیدار شونداری آ جہانی مذاکرات و عمل اٹ پارلیمنٹ اہم ءُ کڑد اس تخک، راجہ پرویز اشرف

0

Get real time updates directly on you device, subscribe now.

اسلام آباد : بین الپارلیمانی یونین (آئی پی یو) نا صدر دوراتے پچیکو سے شنبے نادے قومی اسمبلی نا اسپیکر راجہ پرویز اشرف تون اوڑدہی کرے ہراٹی ہڑتوم آ راہشونک ڈیہہ ٹی امن و سوگوی نا مون آ دننگ اٹ پارلیمانی سفارتکاری اتون اوار اوار بین الپارلیمانی کمکاری ءِ سوگو کننگ نا اہمیت آ گپ وتران کریر۔ قومی اسمبلی سیکرٹریٹ آن جاری بیان نا رداٹ اوڑدہی ٹی اسپیکر داہیت آ زور شاغا کہ چاگڑدی بدلی، دہشت گردی و جہانی ڈوہ کون آ چیلنج آتون مون تننگ کن بین الپارلیمانی کمکاری بھا ز اہم ءِ۔ اودا پیچیدہ و باہم گنڈوک ویل آتا ایسر اس پٹنگ کن پارلیمنٹرین آتے سیم و سیاسی وَنڈ آن ایڑتر مرسا اواری اٹ کاریم کننگ نا گرج آ زور شاغا۔ اسپیکر آئی پی یو نا صدر کن خیرخواہی نا جوزہ غاتا درشانی ءِ کرسا پارے کہ او قومی اسمبلی و آئی پی یو نا ایلو ممبر ملک آتا نیام اٹ پدریسہ رابطہ غاتے پک کننگ کن اہم کڑد ادا کننگ ءِ۔ اوپارے کہ جمہوریت، امن، انسانی حق وپائیدار شونداری آ جہانی مذاکرات و عمل اٹ پارلیمنٹ اہم ءُ کڑد اس تخک۔ آئی پی یو نا صدر اسپیکر نا کنڈ آن خیرخواہی نا جوزہ غاتیا منت واری ءِ ہرفے۔ اوپشاور اٹی دہشت گردی نا ساڑی آ واقعہ غا ڈکھیائی و است ہسونی نا درشانی و زہمی تا خاہوت تون ہمدردی نا درشانی ءِ کرے۔ اوپارے کہ دہشت گردی دنیا کن اسہ بھلو چیلنج اسے، دہشت گردی نا ویل آتا ایسری کن اواری اٹ کاریم کننگ المی ءِ۔ اواسپیکر ءِ باور کرفے کہ دہشت گردی نا ویل ءِ آخبت آئی پی یو کانفرنس نا ایجنڈا ٹی اوار کننگک، و دا جہانی خطرہ تون مون تننگ کن آئی پی یو تینا کڑد ءِ ادا کیک۔ اسپیکر آئی پی یو نا صدر نا باوری کرفنگ نا ستاءِ کرے و دہشت گردی تون مون تننگ کن اجتماعی جہانی کوشست آتا اہمیت آ زور شاغا۔ اوزور شاغساپارے کہ اواری اٹ کاریم کننگ آں نن دا پیچیدہ و آخبتی ویل انا دیرپا ایسر اس پٹنگ نا اومیت کننگ کینہ۔ یات سلے کہ ہڑتوم آ راہشون تا نیام اٹ اوڑدہی آئی پی یو و قومی اسمبلی نا نیام اٹ مہالو آن خڑکی تعلقداری تے پین ودفنگ نا کنڈآ اسہ اہم ءُ گام اسے، ہڑتوم آ راہشونک ساف ستھراچاگڑد، امن و جہانی شونداری کن آخبت اٹ کمکاری ءِ برجاتخنگ نا اومیت ظاہر کرے۔

(اے پی پی)

Get real time updates directly on you device, subscribe now.

Leave A Reply

Your email address will not be published.