السی غاو تا ایسری ءِ حکومت اولیت ایتک، فرح عظیم شاہ

کوئٹہ :  ترجمان حکومت بلوچستان گودی فرح عظیم شاہ پارینے کہ صوبائی حکومت وزیراعلیٰ بلوچستان میر عبدالقدوس بزنجو ناکماشی ٹی السی ویل آتے ایسر کننگ کن کوشست کننگ اٹی ءِ۔ وزیراعلیٰ سیکرٹریٹ اٹ ’ای شکایت سیل‘ جوڑ کننگ دا بابت اہم ءُ پیش رفت اس مریک‘ السی غاو تا ایسری ءِ صوبائی حکومت اولیت ایتک‘ تینا کچ اٹنگا وسیلہ غاتے ٹی الس نا پبی وڑ اٹ خذمت ءِ کرسا کانہ‘ الس ءِ کل بنداوی آسراتی تا فراوانی ءِ پک کننگک‘ ترجمان بلوچستان حکومت گودی فرح عظیم شاہ پارے کہ ننے تینا زمواری تے گچین وڑ اٹ سر تروئی ءِ تاکہ حکومت آ الس نا پت برجا سلے۔ حکومت تعلیم‘ جانجوڑی‘ امن وایمنی و انفراسٹرکچر نا آب اٹ آسراتی تا فراوانی کن کوشست کننگ اٹی ءِ‘ پرامن چاگڑد اٹ پی ایس ایل انا نمائشی میچ مننگ ستا کڑزک‘ الس تینا ہیرو تیکن مہر انا درشانی ءِ کریر۔ ساڑی حکومت آخبت اٹ ہم ہندا وڑ انا ایونٹ کرفنگ کن کوشست کی۔ ترجمان پارے کہ بلوچستان نا زیبائی‘ قدرتی وسیلہ و ٹیلنٹ ءِ مون آ اتنگ نا گرج ءِ تاکہ صوبہ نا مثبت امیج ءِ دنیا نا مون آ پیش کننگ مرے۔ بلوچستان پاکستان نا کل آنا بھلا صوبہ مننگ تون اوار قدرتی وسیلہ غاتیان شپ آ ڈیہہ ءِ‘ گرج دا گڑاناءِ کہ دا وسیلہ غاتے کاریم اٹ اتسا بلوچستان نا شونداری وشونہالی نا مزل ءِ پک کننگے ہراڑکن ساڑی صوبائی حکومت جم حکمت عملی اٹ عمل کننگ اٹی ءِ۔

(خ ن)