پٹرولیم کاختی کون آ ویل آ شرفمند آ ہائیکورٹ گچین ءُ سلاہ اس تسنے، اسد قیصر

اسلام آباد(آن لائن)اٹارنی جنرل آف پاکستان خالد جاوید خان اینو اسپیکر قومی اسمبلی اسد قیصر تون اسلام آباد اٹ اوڑدہی کرے۔ اوڑدہی ٹی لاہور ہائیکورٹ نا 30 جون، 2020 ءِ تروک آ آرڈر آ ہیت وگپ کننگا۔ حوال نا رداٹ  اٹارنی جنرل اسپیکر ءِ پٹرولیم مصنوعات نا کاختی و نہاد آتا بابت لاہور ہائیکورٹ نا آزرویشن آن معلومدار کرے۔ اسپیکر پارینے کہ پارلیمنٹ کن عدلیہ محترم ءِ اونا تروک آ آبزرویشن نا قدر ءِ کینہ۔ اسپیکر پارینے کہ پٹرولیم مصنوعات نا کاختی آمبار انگا اُلسی ویل آ معزز ہائیکورٹ نا رائے مناسب ءِ۔ اسپیکر پارینے کہ پیٹرولیم مصنوعات آتا کاختی و اوفتا نہاد آتیٹی ودکی نا بابت قومی اسمبلی قائمہ کمیٹی براے توانائی آن مالو آن رپورٹ ءِ بٹنگانن۔ اُلسی ویل آتا ایسری آن پارلیمنٹ نا کڑد انا ہیت ءِ کرسا اسپیکر پارینے کہ گچین آ نمائندہ غاک پارلیمنٹ اٹ تینا گچین کروک آ حلقہ نا بابت ویل آتے مون آ اتیرہ۔ اسپیکر پارینے کہ بجٹ سیشن اٹ حکومتی و اپوزیشن بینچ آتیان پٹرولیم مصنوعات آتا کاختی و اُلس ءِ دوئی مروک آ ویل آتیا ہیت کننگا۔ او پارینے کہ مالو ہم پارلیمنٹ تینا کڑد ءِ ادا کرسا کرینے او مستی ہم اُلسی ویل آتیا تینا کڑد ءِ ادا کرسا کیک۔ انتظامیہ آ پارلیمانی نگرانی نا گام گیج آتا ذکر ءِ کرسا اسپیکر قومی اسمبلی پارینے کہ کورونا وائرس دَین آ پارلیمانی کمیٹی، کرونا وائرس نا سوب آن پیشن ملک آتیٹی اختہ انگا پاکستانیوں نا پدی اتنگ، بلوچستان نا ویل و کشاری مصنوعات آتیا جوڑ کروک آ خصوصی آ کمیٹیک دانا اسہ گچین ءُ مثال اسے ءُ۔ اوڑدہی ٹی  اسپیکر قومی اسمبلی نا آئینی و کانودی امور آ سلاہکار لطیف یوسفزئی ہم ساڑی ئس۔