ہژدمی ترمیم نا اول سر جاچ آن گچینی نا اومیت مننگ کیک، ڈاکٹر علوی

اسلام آباد(آن لائن) صدر مملکت عارف علوی پارینے کہ ہژدمی ترمیم نا اول سر جاچ آن  گچینی نا اومیت مننگ کیک، سندھ حکومت نا اختیار آتے دوئی کننگ نا سلاہ غا سجفتنن۔  بنجاہ و صوبہ ٹی اختلاف آک مریرہ کارہ، وسیلہ غاتا بشخ و پانٹ آ اختلاف آک ہڑدے نا ہیت ءُ، پاکستان اٹ آجوئی ٹی وڈی خوری کننگانے، وڈی خوری برجا سلیس تو ادارہ غاتا حال اسٹیل مل آمبار مریک، نیب ءِ مالم جبہ، بلین ٹری و بی آر ٹٰی آمبار انگا ڈٹ آتا جاست و پاست کروئی تمک، نیب اگہ ہندا کیس آتا جاست و پاست ءِ کتو تو کس اسے تو پٹیشن اس دائر کروئی مریک کہ نیب دُن انتئے کننگ اٹی اف، جہانگیر ترین ءِ حکومت پیشن راہی کتو، او پدی بریک۔ دا خیال آتا درشانی ءِ او ٹی وی نا اسہ پروگرام اسے ٹی تینا خیال آتا درشانی ءِ کرسا کرے۔ صدرمملکت پارینے کہ عمران خان نا وڈی خوری نا برخلاف جنگ برجا ءِ۔ اولیکو وار حکومت اسکینڈل آتا جاست و پاست آن پد رپورٹ آتے مون آ ایسنے۔ او مستی پارینے کہ 1300نیب مقدمہ غاتیٹی بیرہ 5 بیوروکریٹ آتا برخلاف ئسر، نیب نا کانود اسہ وڑ ءِ، اگہ کس اس نیب انا کانود آتیا منپک تو او پٹیشن دائر کے۔ او پرائیویٹ آ ادارہ غاتا جاست وپاست انا حوالہ ترسا پارینے کہ راج اٹ  15 آن 20 درسد اسکلان کورونا ساڑی ءِ ولے اُلس اٹ دانا نشانیک افس او نن ‘ہرڈ امیونٹی’ نا کنڈ آ ہننگ اٹی اُن۔ بھلا عئید آ کورونا وائرس نا تالانی ءِ توننگ نا بابت اٹ سوج اسے نا ورندی ٹی پارے کہ کورونا وائرس ساہدار تیان آخا وخت اس کہ بندغ آتا مچی آن تالان مریک۔