بنجائی ادارہ غاتیٹی ملازمت کروک آتا جعلی ڈومیسائل آتے منسوخ کینہ، جام کمال

کوئٹہ (آن لائن) وزیر اعلیٰ بلوچستان جام کمال خان پارینے کہ بلوچستان نا کوٹہ غا بنجائی ادارہ غاتیٹی ڈیوٹی کروک آ جعلی ڈومیسائل آتے منسوخ کینہ۔ تدوک آ دے تینا اسہ بیان اسے ٹی وزیر اعلیٰ بلوچستان پارینے کہ حکومت نا جعلی ڈومیسائل نا منسوخی نا فیصلہ تینا وڑ نا اولیکو گام گیج ءِ۔ مالو ہچ ءُ حکومت اس جعلی ڈومیسائل نا ویل ءِ خوڑتی اٹ ہلتنے۔ کل ڈپٹی کمشنر آتے جاری ڈومیسائل نا اسکروٹنی نا پارت کننگانے،  ڈپٹی کمشنرمستونگ 400 جعلی ڈومیسائل آتے منسوخ کرینے۔ جام کمال خان پارینے کہ ڈپٹی کمشنر مستونگ 400 جعلی ڈومیسائل منسوخ کرینے۔ یات سلے کہ بلوچستان بار کونسل بنجائی محکمہ غاتیٹی  بلوچستان نا کوٹہ غا ہزار آتا کچ اٹ جعلی لوکل ڈومیسائل نا کمک اٹ تعیناتی آ اُست ہسونی نا درشانی ءِ کریسُس۔ حوال نا رداٹ گورنر بلوچستان امان اللہ خان یاسین زئی ہم پارینے کہ نن اولیکو دے آن بنجاہ ٹی بلوچستان کن جتا کروک آ کوٹہ غا بلوچستان نا ہندی بندغ آتا تعیناتی ءِ پک کننگ، جعلی ڈومیسائل آ بھرتی آ ملازم آتے زوت اس برطرف کننگ و صوبہ نا کل ضلع غاتیٹی پین جعلی ڈومیسائل تننگ ءِ تننگ نا ویل ءِ خوڑتی اٹ ہرانن و دانا بابت اُست ہسونی نا درشانی ءِ ہم کرینن۔ دا بابت اٹ مالو بنجائی محکمہ غاتیٹی بلوچستان نا کوٹہ غا جعلی ڈومیسائل آ تعینات ہزار آ پیشن نا بندغ آتا  ریکارڈ ءِ بٹنگسا صوبہ نا کل ضلع غاتا ڈپٹی کمشنر آتے جعلی ڈومیسائل نا اول سر آن پک کننگ نا عمل ءِ بنا کرین ہرا ہندی بندغ آتے اوفتا کانودی حق ءِ تننگ کن جوان ءُ گام اسے۔ تینا اسہ بیان اسے ٹی گورنر یاسین زئی پارینے کہ بنجائی محکمہ غاتیٹی بلوچستان نا کوٹہ غا بلوچستان نا ہندی آ بندغ آتے تعینات کننگ آن صوبہ ٹی بیروزگاری آ بھلو کچ اسسکان کنٹرول کننگک۔