مسلم امہ نا ویل آتا ایسری کن پاکستان تینا کڑد ءِ ادا کننگ ءِ، قاسم سوری

کوئٹہ(آن لائن)ڈپٹی اسپیکر قومی اسمبلی قاسم خان سوری کوئٹہ ٹی ایرانی سفارت خانہ نا دورہ ءِ کرے او کوئٹہ ٹی متعین اسلامی جمہوریہ ایران نا قونصل جنرل حسن درویش وند تون اوڑدہی کرے۔ ڈپٹی اسپیکر قومی اسمبلی اودے قونصل جنرل نا عہدہ ءِ سنبھالنگ آ مبارکبادی تس و اودے تینا زمواری ءِ جوان وڑ اٹ ادا کننگ کن اُست خواہی نا درشانی ءِ کرے۔ اوڑدہی ٹی پاکستان ایران نا ایلمی آ تعلقداری، مسلم امہ ءِ دوئی مروک آ سخت انگا ویل و پاک – ایران اِرا کنڈی پوریاگری نا وارخواہی تے ودفنگ آ ہیت وگپ کریر۔ یات سلے کہ حسن درویش وند داکان مست مسٹ ءُ نیم سال اسکان پشاور اٹ بطورِ ایرانی قونصل جنرل تینا خدمت آتے ادا کرینے۔ او وخت آ کوئٹہ ٹی متعین ایرانی قونصل جنرل تون اوار میڈیا تون ہیت وگپ کرسا ڈپٹی اسپیکر قومی اسمبلی قاسم خان سوری پارینے کہ ننا حکومت کل ہمسایہ تتون جوان تعلقداری نا خواہندار ءِ او اسہ ایلو تون واپاری تے ودفنگ ہم خواہک۔ او پارینے کہ نن تینا  ہمسایہ ملک ایران و اوغانستان تون ٹریڈ مارکیٹ نا تصور ءِ اتسا بننگ اٹی اُن تانکہ ہندا ہمسایہ ملک آتا واپاریک تینا ملک آتا گڑاتے آسانی ٹی بہا کننگ کیر ہراڑان دا ملک آتا اُلس کن آسانی مرے او روزگار نا وارخواہی ودی مرے۔ ڈپٹی اسپیکر قومی اسمبلی پارینے کہ پاکستان تحریکِ انصاف نا حکومت جوان کوشست کرینے کہ ویل آتا گواچی آ مسلم امہ ءِ اوار کننگے مسلم ملک آتے اسہ ایلو آن خڑک کننگے او ویل آتے ایسر کننگ کن پاکستان کڑد ادا کے۔ قاسم خان سوری پارینے کہ حکومت آتا بنداوی آ کاریم غریبی نا ایسری و تینا بندغ آتے روزگار تننگ مریک۔ پاکستان ایران تعلقداری آ ہیت وگپ کرسا ڈپٹی اسپیکر قومی اسمبلی پارینے کہ پاکستان ہر وخت دا خواہک کہ ایران و ایلو ہمسایہ ملک آتون ایلمی نا تعلقداری مرے۔ او پارینے کہ ساڑی جہانی دَین کورونا وائرس اٹ ہراتم ایران سختی تا گواچی ئس تو پاکستان مچ آ دنیا ٹی ایران کن توار چِست کرے او جہانی برادری آن ایران آ خلوک آ اقتصادی پابندی تے اینگ کننگ نا خواست ہم کرے۔