جہانی بینک نا اسہ پین شڑت اس پورو، وام رسینگ نا گمان سوگو

اسلام آباد : پاکستان جہانی بینک آن 450 ملین ڈالر وام ہلنگ کن اسہ پین شڑت اس پورو کرے ہراکان پد جہانی بینک انا کنڈآن وام تا منظوری نا گمان ودانے۔ وزیر خزانہ اسحق ڈار جہانی بینک انا صدر ءِ وام جاری کننگ کن بورڈ میٹنگ آ منفک۔ حوال نا رد اٹ نیشنل ٹیکس کونسل نا کنڈآن صوبہ و بنجا نا نیام اٹ سروسز آ ٹیکس ہلنگ نا دنگ انا پک کننگ ناقاعدہ نا منظوری تننگانے۔ وزارت خزانہ نا رد اٹ دا مچ آ ملک اٹ ٹیکس ہلنگ نا نظام ءِ گچین کننگ کن اسہ مزل نا نشان اسے ہراکہ جہانی بینک آن وام ہلنگ اٹ اہم کڑدار ادا کیک‘ کمامدار آتا رد اٹ صوبہ غاک کابینہ نامنظوری آن پد یکم مئی اسکان دا رد اٹ تینا فیصلہ غان معلومدار کیرہ‘ حوالی نا رد اٹ سندھ بروک مالی سال آن ہندا قاعدہ غاتے نافذ کننگ خواہک وخت اس کہ بنجا پاہک کہ برجا تُو اپریل آن دا قاعدہ غاتا اطلاق ءِ کننگے تاکہ جہانی بینک آن وام ہلنگ مننگ کے۔ پاکستانی کمامدار آک پارینو کہ قاعدہ غاتامنظوری و اوڑا عملدرآمد جہانی بینک انا کنڈآن 450 ملین ڈالر وام ہلنگ اٹ اسٹ انا اڑاند ئس ہرادے اینک کننگانے‘ حوالی نا رد اٹ قاعدہ غاتا منظوری آن پد داسہ اسحاق ڈار جہانی بینک انا صدر تون تینا اوڑدہی ٹی ہرا بروک آ منہ دے اٹ مریک‘ وام تا منظوری کن بورڈ میٹنگ بٹنگ انگ نا خواست کیک‘ گمانی وڑ اٹ اسحاق ڈار 6 سَد ملین ڈالر نا ایفورڈ ایبل انرجی نا سیکنڈ پروگرام نا وام تا منظوری نا درخواست ءِ ہم کیک‘ یات سلے کہ پاکستان ءِ 6 بلین ڈالر وام ہلنگ کن سخت مشکل مون تروک ءِ و داسہ ہم سعودی عرب ہمو اسٹ انگا ملک ءِ‘ ہرا زبانی وڑ اٹ آئی ایم ایف ءِ 2 ارب ڈالر نا وام تننگ نا باورکرفینے وخت اس کہ متحدہ عرب امارات نا کنڈآن داسکان ہچ ءُ ضمانت اس تننگ تنے۔

(آن لائن)