تخت لاہور آ تولسا غیر جمہوری واکدار تے ورندی ایتنہ، بلاول بھٹو

نن منپنہ کہ ملک اٹ انصاف نا ہم ادارہ اس ارے، ادارہ ٹی منہ بندغ اس ضد کننگ اٹی ءُ، سیاست ہم کننگ اٹی ءُ، وزیر خارجہ

0

Get real time updates directly on you device, subscribe now.

خیبرپور: وزیر خارجہ بلاول بھٹو زرداری پارینے کہ نن منپنہ کہ ملک اٹ انصاف نا ہم ادارہ اس ارے‘ ادارہ ٹی منہ بندغ اس ضد کننگ اٹی ءُ‘ سیاست ہم کننگ اٹی ءُ‘ اگہ کس ءِ سیاست کروئی ءِ تو تیاری کے نن اوڑتون سیاست اٹ گو تفنہ‘ دا دتکی کروک آتے پبی ءُ ورندی ایتنہ۔ وزیراعلیٰ سندھ تینا کاریم ءِ برجا تخے‘ تخت لاہور اٹ تولسا دا غیرجمہوری واکدار آتے ورندی ایتنہ۔ داخیال آتا درشانی ءِ او پیر عبدالقادر شاہ جیلانی انسٹی ٹیوٹ آف میڈیکل سائنس گمبٹ اٹ پاکستان نا اولیکو پف انا پیوند کاری نا بشخ انا بنائی و ملک انا اولیکو ہیلتھ سٹی ودارو تا یونٹ نابنداو ءِ تخنگ نا دود آن تران کرسا کرے۔ وزیر خارجہ پارے کہ سپریم کورٹ نا جج آک تینا واکداری تے تینا سنگت آتتون شیئر کننگ کن تیار افس۔ آصف زرداری صدر مننگ آن پد ہم تینا واکداری تے پارلیمان ءِ تس۔ بلاول بھٹو پارے کہ آصف زرداری سی پیک نا بناءِ کرے‘ ہندا عدالت آک قائد عوام ءِ پاؤ تسر‘ دا جج آک لیکچر ایترہ کہ دیر کرپٹ و دیر سیسلین مافیا ءِ‘ نن منپنہ کہ دا ملک اٹ انصاف نا ادارہ اس ہم ارے‘ بھٹو نا مسٹمیکو چین انصاف خواہنگ اٹی ءِ‘ بھٹو مسلم امہ نا قائد مسنے‘ اینو اسکان اسہ جج اس ہم شہید بھٹو نا کیس ءِ بنتنے‘اوپارے کہ دا ہرا ادارہ غاک ءُ دا دتک‘ لغور مسنو دافتے مشرف نظر بفک‘ سلیکٹڈ راج انا کمک اٹ نابود ءُ وزیراعظم بیٹ کننگا‘ ہرانا سوب آن اینو زرگزرانی تنکی ءِ‘ ہراتم اودے بیٹ کننگا تو مگہ؟ ہمو وخت آ نما ازخود نوٹس ہرانگ ئس؟۔ بلاول بھٹو پارے کہ فریال تالپور ءِ ہراتم عئید انا نن گرسا جیل کننگا ہرانگ ئس سوموٹو نوٹس؟ ہراتم عمران بجٹ پاس کرفنگ کن آئی ایس آئی ءِ کاریم اٹ ایسکہ مگہ کور ئسرے؟ تخت لاہور نا جنگ پاکستان ءِ بھس کیک۔

(آن لائن)

Get real time updates directly on you device, subscribe now.

Leave A Reply

Your email address will not be published.