سپریم کورٹ نا 90 دے ٹی گچین کاری کرفنگ نا پرمان

گورنر ءِ آئین نا رداٹ مسہ حالیت اٹی واکداری تننگا، گورنر آرٹیکل 112 نا رداٹ، ارٹمیکو وزیراعلیٰ نا ایڈوائس آ اسمبلی پرغک، صوبہ پنجاب و خیبرپختونخوا ٹی گچین کاری تے 90 دے ٹی کننگے، سپریم کورٹ

0

Get real time updates directly on you device, subscribe now.

اسلام آباد : سپریم کورٹ صوبہ پنجاب و خیبرپختونخوا (کے پی) ٹی گچین کاری تے 90 دے تیٹی کرفنگ نا پرمان کرینے۔ چارشنبے نادے آ چیف جسٹس عمر عطاء بندیال نا کماشی ٹی پنچ باسکی بنچ مسٹ اِرٹ نا کچ اٹ ڈک فیصلہ ءِ بنفے۔ فیصلہ ٹی 5 باسکی بنچ نا اِرا باسک درخواست آتا قابل سماعت مننگ آ اعتراض کریر۔ جسٹس منصور علی شاہ و جسٹس جمال مندوخیل فیصلہ غان اختلاف کریر۔ گیشتری فیصلہ ٹی پاننگانے کہ جنرل گچین کاری تا وڑوڈول جتا مریک، آئین اٹی گچین کاری تیکن 90،90 دے انا وخت تننگانے، اسمبلی نا پننگ آن پد 90 دے اٹی گچین کاری مننگ المی ءِ، پنجاب اسمبلی گورنر نا دستخط مفننگ آ 48 گھنٹہ ٹی تینٹ پنا، وخت اس کہ کے پی کے اسمبلی گورنر نا منظوری آ پنا،۔ فیصلہ ٹی پاننگانے کہ گورنر ءِ آئین نا رداٹ مسہ حالیت آتیٹی واکداری تننگا، گورنر آرٹیکل 112 نا رداٹ، ارٹمیکو وزیراعلیٰ نا ایڈوائس آ اسمبلی پرغک، آئین نا آرٹیکل 222 پاہک کہ گچین کاری بنجا نا سبجیکٹ ءِ، الیکشن ایکٹ گورنر و صدر ءِ گچین کاری تا تاریخ نا پڑو نا اختیار ایتک۔ فیصلہ ٹی پاننگانے کہ الیکشن کمیشن تون سلابت آن پد صدر پنجاب اٹی گچین کاری تا تاریخ نا پڑو ءِ کے وخت اس کہ گورنر کے پی صوبائی اسمبلی ٹی گچین کاری تا تاریخ نا پڑو ءِ کے، ہرصوبہ ٹی گچین کاری آئینی مد انا تہہ ٹی مرے۔ چیف جسٹس عمر عطابندیال آ تالان پنچ باسکی بنچ سے شنبے نادے آ سماعت پورو مننگ آ فیصلہ ءِ ڈک کریسس۔ بنجائی حکومت پنجاب و خیبرپختونخوا ٹی لس گچین کاری تا بابت سپریم کورٹ نا فیصلہ ءِ ناپورو گوندسا پیدوار کرینے کہ دا فیصلہ چار مسٹ اٹ بسنے‘ مسٹ ارٹ اٹ بتنے‘ انتئے کہ اِرا جج مہالو بنچ آن تینٹ جتا مسوسر و اینو نا فیصلہ ٹی پین اِرا جج اختلافی نوٹ تسنو۔ وزیر اعظم دا باندات آ سیوتی تے پت اٹ ہلنگ نا فیصلہ کرینے وخت اس کہ نواز شریف تون ہم ٹیل فون آسلاہ کرینے‘ حوالی نا رد اٹ سپریم کورٹ نا فیصلہ غان گڈ وزیراعظم شہباز شریف ناکماشی ٹی اہم ءُ سلابتی ءُ دیوان اس اڈہلک دیوان اٹ بنجائی وزیرک‘ سینئر پارٹی راہشون و کانودی چاہندار آک بشخ ہلکر‘ دیوان اٹ سپریم کورٹ نا فیصلہ غا وزیرکانود بریفنگ تس‘ فیصلہ نا کاپی ءِ ہم وزیراعظم ءِ فراوان کننگا‘ دیوان اٹ وزیر کانود و اٹارنی جنرل نا موقف تون امنائی کننگا، سپریم کورٹ نا فیصلہ نا آئینی و کانودی ٹک آتیا ہڑتوم آک بریفنگ تسر‘ وزیرکانود دیوان ءِ بریفنگ اٹ پارے کہ سپریم کورٹ نا فیصلہ ٹی اصل اٹ مسٹ حق اٹ و چار اختلاف کرینو و پٹیشن مسترد مسنے۔ وزیراعظم ن لیگ نا مواف آ تینا سیوتی تتون سلاہ کننگ نافیصلہ کرینے۔ داکان گڈ وزیراعظم شہباز شریف پارٹی قائد نواز شریف تون ٹیل فون آ رابطہ کرینے و اودے سپریم کورٹ نا فیصلہ نا ٹک آتیان آگاہ کرینے۔ نوازشریف فیصلہ غا امنائی اٹ حکمت عملی تینائی کننگ آ زور شاغانے۔

(اے پی پی/ آن لائن)

Get real time updates directly on you device, subscribe now.

Leave A Reply

Your email address will not be published.