کوئٹہ ٹی اسہ دے ئی فوڈ فیسٹیول 4 فروری نا دے اڈ تننگک

کوئٹہ : کمشنر کوئٹہ ڈویژن سہیل الرحمن بلوچ نا کماشی ٹی کوئٹہ ٹی اسہ دے ئی فوڈ فیسٹیول نا اڈ تننگ نا بابت اٹ دیوان اس اڈ ہلک۔ دیوان اٹ ڈپٹی کمشنر کوئٹہ شہک بلوچ، ایس پی سٹی اشفاق جعفر، ایڈیشنل ڈپٹی کمشنر جنرل کوئٹہ خلیل مراد،ڈپٹی جنرل سیکرٹری انجمن تاجران بلوچستان رحیم آغا، کل اسسٹنٹ کمشنر آتیان بیدس میٹرو پولیٹن کارپوریشن،کیسکو، پاکستان ریلوے ایف سی،12کور آن بیدس فوڈ ریسٹورنٹس،ہوٹل و پوائنٹ آتا ملک و نمائندہ غاک بشخ ہلکر۔ دیوان اٹ فیصلہ کریر کہ کوئٹہ نا شاری تے سیلی چاگڑد اس فراوان کننگ کن ضلعی انتظامیہ نا کنڈآن کوئٹہ ٹی اسہ دے ئی فوڈ فیسٹیول نا اڈ تننگک ہراکہ ریلوے اسٹیشن شنبے نا دے 04 فروری آ دے انا 12بجہ آن ننکان 12بجہ اسکان برجا سلک۔ فوڈ فیسٹیول اٹ کوئٹہ نا روایتی آ ارغ، مزہ و ایلو آئٹم آتا خاص اسٹال خلنگک۔ کوئٹہ شار نا بھلو و جوان ریسٹورنٹ، ہوٹل، فوڈ پوائنٹ و فوڈ برانڈ فیسٹیول اٹ تینا اسٹال آتے خلکر۔ وخت اس کہ فوڈ فیسٹیول اٹ نیاڑی تیکن خاص ءُ انتطام کننگک۔ فوڈ فیسٹیول نا انتظام آتا نگرانی کن اے ڈی سی جنرل کوئٹہ خلیل مراد نا کماشی ٹی اسہ کمیٹی اس تشکیل تننگانے ہراٹی انجمن تاجران،ریلوئے،میٹروپولیٹن کارپوریشن پولیس و 12کور نا اس مریک ہراکہ فوڈ فیسٹیول نا اڈ تننگ، انتظام سیکورٹی و ایلو معاملہ غاتا نگرانی ءِ کیک۔ دیوان اٹ کمشنر کوئٹہ ڈویڑن سہیل الرحمن بلوچ پارینے کہ کوئٹہ نا شاری تے سیل و سواتی ءُ چاگڑد اس فراوان کننگ آن فوڈ فیسٹیول اڈ تننگ بھاز المی ءِ۔

(خ ن)