چین آ ہنوک جوڈیشنل افسر آتا ڈل پاکستان عدلیہ نا سفیر ءِ،چیف جسٹس آف پاکستان

مشکل حالیت آتے ٹی زمواری سرتروک جوڈیشل افسر آتا خذمت آتا امنائی و است بڈی کننگ المی ءِ

0

Get real time updates directly on you device, subscribe now.

اسلام آباد، چیف جسٹس آف پاکستان جسٹس یحییٰ آفریدی چین نا ہیلکاری دورہ کن گچین مروک 25 جوان کارکڑد والا جوڈیشل افسر آتتون اوڑدہی کرے‘ چیف جسٹس آف پاکستان جوڈیشل افسر آتے چین آراہی مننگ آن مست خصوصی بریفنگ تس‘ مچ آ پاکستان آن گچین کروک 25 جوڈیشل افسر آتا اولیکو ڈل اِرا ہفتہ نا عدالتی ہیت وگپ و ہیلکاری پروگرام تے ٹی بشخ ہلنگ کن چین آ کاہک۔ جوڈیشل افسر آتے تعلقدار ہائی کورٹ آتا سلابت اٹ جوان کسبی کارکڑد و خذمت آتا بنداو آ پن کننگا۔ ڈل اٹ پنجاب، سندھ، خیبر پختونخوا، بلوچستان، اسلام آباد، آزاد جموں و کشمیر و گلگت بلتستان نا جوڈیشل افسرآک اوار ءُ‘ سپریم کورٹ آف پاکستان و بنجائی عدالتی اکیڈمی ٹی خذمت سر تروک جوڈیشل افسرآک ہم ڈل انا بشخ ءُ۔ چیف جسٹس آف پاکستان خاص وڑاٹ مر انگا‘ پدتموک و بے ایمنی آن زہمی علاقہ غاتے ٹی خذمت سرتروک جوڈیشل افسر آتا کارکڑد ناستاءِ کرے‘ چیف جسٹس پارے کہ مشکل حالیت آتے ٹی زمواری سرتروک جوڈیشل افسر آتا خذمت آتا امنائی و است بڈی کننگ المی ءِ۔ ہیلکاری پروگرام نا مسخت جوان کارکڑد نشان تروک جوڈیشل افسر آتے کسبی شونداری و جہانی آزموندہ غاتا وارخواہی فراوان کننگ ءِ۔ چیف جسٹس آف پاکستان گچین کروک جوڈیشل افسرآتیان تران کرسا پارے کہ نم چین اٹ پاکستان نا عدلیہ نا سفیر اُرے‘ پاکستان نا عدلیہ نا شرف‘ اقدار و کسبی آب ءِ برجا تخرے‘ چین نا عدالتی وڑوڈول‘ پوسکنوڑ ٹیکنالوجی و کیس مینجمنٹ نظام نا خوڑتی اٹ جاچ ءِ ہلیرے‘ چین نا عدالتی نظام اٹ رائج ہمو جوان انگا وڑ تا نشاندہی ءِ کیرے ہرا پاکستان اٹ انصاف نا فراوانی جوان کننگ کن تینائی کننگ مریر۔

Get real time updates directly on you device, subscribe now.

Leave A Reply

Your email address will not be published.