الس دوست سیاستدان تا کڑد شون ہلوک ملک آتے ٹی نمان مسنے، جعفر خان مندوخیل
جمہوری قدرآتا شون تننگ و گچین حکمرانی ءِ پک کننگ اٹی سیاست نا رمز آتیان معلومدارمننگ المی ءِ
کوئٹہ، گورنر بلوچستان میر جعفر خان مندوخیل پارینے کہ جمہوری قدرآتا شون تننگ و گچین حکمرانی ءِ پک کننگ اٹی سیاست نا رمز آتیان معلومدار‘ زموار و الس ءِ پرسجو سیاستدان نا کڑد بنداوی اہمیت تخک۔ تینا اسہ بیان اسے ٹی او پارے کہ سیاست نا مسخت بیرہ واکداری نا دوئی و تینا پنی مننگ ءِ برجا تخنگ آخا بلکہ السی زمواری تے پہہ مننگ و اوفتے ایمانداری اٹ پورو کننگ ءِ‘ اسہ حقی ءُ الس دوست سیاستدان اس تینا کڑد ءِ عملی گام گیج و السی خذمت آتیان پک کیک۔ گورنر پارے کہ قوم تا تقدیر ءِ بدل کننگ و ملک آتے راجی پسماندگی آن کشسا زرگزرانی شونداری نا کسر آ روان کننگ اٹی الس دوست سیاست و سیاستدان تا کڑد کل شون ہلوک ملک آتیٹی نمان مسنے‘ او پارے کہ الس اٹی حق و زمواری تا پام ءِ دمدستی کننگ، جاگیردارانہ ذہنیت نا چٹفنگ و جمہوری رویہ غاتا شون تننگ کن سیاسی تنظیم آک ستا کڑزرہ‘ جمہوریت نا اصل زیبائی ہندادے کہ اختلاف ءِ دشمنی نا جاگہ غا راج انا فکری وسعت و اجتماعی شونداری نا وسیلہ گوندنگے۔ او دا ہیتءِ ستاکڑزوک گوندا کہ الس خاص وڑ اٹ ووٹر آک داسہ بھاز باشعور مسنو۔ گچین کاری تا وخت آ او خاہوتی وابستگی، جذباتی نعرہ، جندی تعلقداری تا یا وقتی قول تیاں زہمی مننگ نا جاگہ غا اومیتدار آتا کڑد، جمہوری رویہ، سیاسی بصیرت، آزموندہ و السی ویل آتا بابت اونا سنجیدگی ءِ اولیت ایترہ‘ گورنر بلوچستان جعفر خان مندوخیل پارے کہ سیاسی مسخت آتا دوئی کننگ کن سنجیدگی، آزموندہ‘ خذمتِ خلق انا جوزہ و عملی تعلقداری المی ءِ۔