بلوچستان اٹی سرکاری ٹھیکیدار تا روزگار آ زوراک تپہ نا بادشاہی ءِ،کنٹریکٹر نیک محمد
کوئٹہ، بلوچستان گورنمنٹ کنٹریکٹرز ایسوسی ایشن رجسٹرڈ نا صدر نیک محمد کاکڑ پارینے کہ شیڈول ریٹس 2026ء و مارکیٹ اٹی تفوئی میٹریل نا دے پہ دے ودوک آ نہاد آتا سوب آن ٹھیکیدار آتے بھسکاری نا دنگ آ سر کرینے، ایلو کنڈ آ برجا شونداری اسکیم آتا فنڈ آتا سستی اٹ جاری کننگ ٹھیکیدار آتا خواری تے پین ودفینے ہرانا سوب آن ڈٹ آتا وخت آ پوروی و ٹھیکیدار آتا مالی بقا زہمی مننگ اٹی ءِ۔ وزیراعلیٰ بلوچستان مچ آ صوبہ ٹی سرکاری ٹینڈر آتا شفافیت ءِ پک کننگ کن گام گیج کے‘ دا وخت آ ٹھیکیدار آک سرکاری اسکیم آتیا 65 درسد کمیشن تننگ اٹی ءُ‘ دا ہیت آتے او یک شنبے نا دے چیئرمین عبدالرحمن بازئی، سیکرٹری جنرل محمد انور مندوخیل، سیکرٹری حوالکاری روزی خان بڑیچ، فنانس سیکرٹری محمد اعظم، مراد خان، ضیاء الرحمن و ایلوفتتون اوار کوئٹہ پریس کلب اٹی اسیجائی پریس کانفرنس آن تران کرسا کرے۔ او پاریر کہ بلوچستان اٹی سرکاری ٹھیکیدار آتا روزگار آ بااثر تپہ نا بادشاہی و بیوروکریسی نا کمک اٹ اثر و رسوخ نا کاریم اٹ اتنگ آن تعلقدار غاو تیٹی ودکی مننگ اٹی ءِ، وخت اس کہ سرکاری شونداری ڈٹ آتیٹی شفافیت و میرٹ نا کاختی کسبی ٹھیکیدار آتیکن بھلو ویل ودی کننگ اٹی ءِ ہرا ہچ گہس امنا مننگ کپسہ‘ او پاریر کہ بلوچستان نا قبائلی علاقہ غاتیٹی مہالو سرکاری ٹھیکہ غاتیا ہچ ءُ ٹیکس اس الو داسہ حکومت اوفتیا ٹیکس لاگو کرینے دا علاقہ غاتیٹی فیکٹری، کسر و تفوئی میٹریل نا ہندی منڈی تا کمتی نا سوب آن گڑا ایلو صوبہ غاتیان و ضلع تیاں خوائفوئی تمک ہرانا سوب آن سرکننگ و ایلو خڑچ آتے ٹی ودکی مریک، دا حالیت آتیٹی ٹیکس انا ودکی باریم ٹھیکیدار تیکن پین خواری ودی کیک، حکومت دمدستی وڑ اٹ قبائلی علاقہ غاتیا خلوک انکم ٹیکس ءِ پدی ہلے او پاریر کہ شونداری ڈٹ آتیٹی شفافیت و میرٹ ءِ امر کہ مرے پک کرے۔