پیٹرولیم نا ودوک آ نہاد آتا باریم ءِ الس آ گدریفنگ آن توننگ کن گام گیج کننگ اُن،وزیراعظم محمد شہباز شریف

اسلام آباد، وزیراعظم محمد شہباز شریف پارینے کہ پاکستان ڈیہہ اٹی امن و سوگوی و بے چیٹی ءِ کم کننگ کن سخت اٹ سفارتی کوشست آتے برجاتخانے، جہانی کہول آ پیٹرولیم نا ودوک آ نہاد آتا بھاریم ءِ الس آ گدریفنگ آن توننگ کن حکومت وس انا کچ آ گام گیج کننگ اٹی ءِ، ملک اٹی فیول سبسڈی نا شاندارپروگرام سرسہبی اٹ برجاءِ ہرا دسمبر نا اخیر اسکان سلک، ایل این جی نا درآمد آن ارب آ روپئی کٹیا کروک آ مافیا نا دور چٹانے، خیبرپختونخوا کن 160 ارب روپئی نا شونداری پیکیج تننگانے، دہشت گردی نا پورو چٹفنگ کن بنجائی و صوبائی حکومت آک سیکورٹی ادارہ غاتتون اواری اٹ پبی گام گیج کیرہ۔ چارشنبے نادے آ بنجائی کابینہ نا دیوان اٹی ہیت وگپ کرسا وزیراعظم شہباز شریف پارے کہ داوخت دنیا ٹی تیل انا نہاد آک آسمان آ سرمسنو، دانا بھلا سوب ڈیہہ اٹی بدامنی ءِ، پاکستان امن کن مہالوآنبار تینا پبی کڑد ءِ ادا کننگ ءِ، تدوک آ ہفتہ ٹی پاکستانی ڈل اِرا وار تہران نا دورہ ءِ کرے، فیلڈ مارشل عاصم منیر ہم تہران آ ہنا ہراڑے پاکستان، سعودی عرب، ایران و ترکیہ نا بڑزکو کمامدارآتا نیام اٹ گپ وتران مس، ہموڑے پاکستان، سعودی عرب و ترکیہ نا نیام اٹ معاہدہ نابابت ہم گچین چاگڑد اٹی گپ وتران مس کہ ہرا وڑ ڈیہہ اٹی تین پہ تینی ہم گرنچی ءِ مونی دننگ مرے۔ او پارے کہ ملک اٹی فیول سبسڈی نا شاندارپروگرام سرسہبی اٹ برجاءِ ہرا دسمبر نا اخیر اسکان سلک، یک و نیم کروڑ بندغ آک ٹوکن ءِ کاریم اٹ ایسنو و اگہ پنچ بندغ آتیا تالان خاہوت مرے تو ہچ مف ہفت و نیم کروڑ بندغ فائدہ ہرفینو۔ حکومت توانائی نا نہاد آتیٹی ودکی نا بھاریم ءِ لس بندغ آ شاغنگ کن الیتو، جمعہ نادے آ جہانی مارکیٹ اٹی پیٹرولیم نا نہاد آتیٹی ودکی نا سوب آن پیٹرول نا نہاد اٹی 15 روپئی فی لیٹر ودکی نا باریم ءِ الس آ شاغنگتو بلکن وزیر پیٹرولیم و اونا ٹیم ریفائنریز تون ہم گپ وتران کرے اودے پاننگاکہ دا بھاریم ءِ الس آ شاغنگ نا جاگہ غا او سگر، داڑا وزیرپیٹرولیم و اونا ٹیم ءِ مبارکبادی پیش کینہ۔ وزیراعظم پارے کہ ڈیہہ انا حالیت آتا سوب آن جہانی کہول آ پیٹرولیم نا نہاد آتیٹی مروک آ ودکی نا رداٹ السی ریلیف کن فیول سبسڈی اسکیم جاری کننگا ہراڑان داتم اسکان ہفت و نیم کروڑ بندغ فائدہ ہرفینو و دامد اٹی کم و ود 28 ارب روپئی نا سبسڈی تننگانے، داپروگرام بھاز سرسہبی و شفاف وڑاٹ مونی ہِننگ ءِ۔ داڑا تعلقدار کمامدارآک پورو نظر تخانو، گڑاس پٹرول پمپ آتیان داسکیم نا رداٹ گڑبڑنا حوال ہم ملانے و لے اوفتیا پورو نظر ءِ و اوفتا برخلاف پبی کارروائی مریک۔ اووزیر پیٹرولیم ءِ پارت کرے کہ او داوڑ انا پیٹرول پمپ آتے بند کے، اوفتے سزاتننگے تانکہ دا عبرت کیر۔ وزیراعظم پارے کہ ہندا وڑ نن ایل این جی مافیا ہرا اونا درآمد آن ار ب آ روپئی کٹیاکریر، داڑان کیہی دہائی آن پد خلاصی دوئی کرینن و داسہ مافیا نا دور چٹانے، داسہ گوبر و شفافیت اٹ ایل پی جی نا درآمد و اونا بست وبند کننگ انگ ءِ، پی ایس او و پارکو کون آ سرکاری ادارہ غاتا کمک اٹ باندات نا بست وبند کننگ انگ ءِ۔ اوپارے کہ نائب وزیراعظم، وزیر توانائی و وزیرخزانہ تون اوار اونا مچ آ ٹیم ءِ شاباشی ایتنہ کہ کیہی دہائی آن پد دا ویل ایسر مسنے۔