میر سرفراز بگٹی و مریم نواز شریف نا امنائی،بلوچستان اٹی سیف سٹی ڈٹ آتے کن پنجاب آن کمک ہلنگ نا فیصلہ

کوئٹہ، وزیراعلیٰ بلوچستان میر سرفراز بگٹی و وزیراعلیٰ پنجاب مریم نواز شریف بلوچستان اٹ سیف سٹی ڈٹ آتے گچین، فعال و پوسکن آ خواست آتتون ہم گرنچ کننگ کن اسیجائی کمکاری آ امناکرینو۔ وزیراعلیٰ بلوچستان نا چٹھی آ وزیراعلیٰ پنجاب بلوچستان سیف سٹی اتھارٹی ءِ سوگو جوڑ کننگ واودے المی ادارہ ئی کمکاری فراوان کننگ کن تعلقدار کمامدارآتے پارت کرینے دا رد اٹ بلوچستان وپنجاب نا سیف سٹی اتھارٹیز نا نیام اٹ جوائنٹ وینچر نا رداٹ سیکورٹی مانیٹرنگ نا نظام ءِ پین گچین جوڑ کننگ، تکنیکی کمکاری و آزموندہ غاتا ہل و تس آ امنا کننگانے۔ دابابت وزیراعلیٰ بلوچستان میر سرفراز بگٹی نا کماشی ٹی بلوچستان سیف سٹی اتھارٹی نا دیوان اس اڈ ہلک، ہراٹی ایڈیشنل چیف سیکرٹری داخلہ محمد حمزہ شفقات برجا ڈٹ وپیشرفت نا بابت سرجم حوال تس۔ دیوان ءِ پاننگانے کہ بلوچستان نا 9 شار اٹی سیف سٹی ڈٹ آتیا کاریم برجاءِ۔ ڈی جی پنجاب سیف سٹی اتھارٹی احسن یونس پارے کہ پنجاب سیف سٹی اتھارٹی بلوچستان نا کاریمی تا ہیلکاری، کاریم نا کچ اٹی ودکی و پوسکن تکنیکی کمکاری فراوان کیک تانکہ صوبہ ٹی سیف سٹی ڈٹ آتے گچین وڑاٹ فعال کننگ مرے۔ دیوان آن تران کرسا وزیراعلیٰ میر سرفراز بگٹی پارے کہ سیف سٹی ڈٹ آک بیرہ چاروکی نا نظام افس بلکن شاری تا جان و مال انا رکھ اکن پوسکن سیکورٹی انفراسٹرکچر نا بنداو آک ءُ۔ بلوچستان اٹ امن و ایمنی نا جوڑ کننگ، کسبی ڈوہدار آتا ہن وبر آ نظرتخنگ، شکبر سرجزآتا وخت آ پیدواری و کانود نافذ کروک ادارہ غاتا دمدستی ردعمل ءِ گچین جوڑ کننگ اٹ کمک رسینگک۔ وزیراعلیٰ پارت کرے کہ صوبہ نا 9 شار اٹ برجاسیف سٹی ڈٹ آتیاکاریم ءِ پین ترند کننگے و کل تعلقدار محکمہ غاک تین پہ تینی رابطہ و زمواری اٹ ڈٹ آتا تخوک آ مد اٹی پوروی ءِ پک کیر۔ او پارے کہ پوسکن آ ٹیکنالوجی نا کمک اٹ سیکورٹی مانیٹرنگ ءِ گچین جوڑ کرسا ڈوہ تا توننگ و امن و ایمنی نا حالیت آتیٹی گچینی اتنگ مریک۔ شاری تے رکھی چاگڑد فراوان کننگ حکومت نا اہم زمواری ءِ و او سیف سٹی ڈٹ آتیا پیشرفت نا تینٹ چاروکی ءِ کننگ ءِ۔ وزیراعلیٰ بلوچستان سیف سٹی ڈٹ آتیٹی کمکاری و کمک آ وزیر اعلیٰ پنجاب مریم نواز شریف وپنجاب سیف سٹی اتھارٹی نا منت واری ءِ ہرفسا پارے کہ صوبہ غاتا نیام اٹ ادارہ ئی کمکاری و آزموندہ و السی رکھ انا اسیجائی ہدف آتا دوئی کننگ اٹ کمکار مریک۔ ایڈیشنل چیف سیکرٹری داخلہ بلوچستان محمد حمزہ شفقات دیوان ءِ پارے کہ سیف سٹی ڈٹ آتا پوری آن 9 شار اٹ پوسکن آ ٹیکنالوجی نا کمک اٹ سیکورٹی مانیٹرنگ نا نظام جوڑ مریک، ہراڑان ڈوہ تا توننگ، شکبر سرجزآتا وخت آ پیدواری و کانود نافذ کروک ادارہ غاتا کاریم نا کچ اٹی ودکی پک مریک۔ دیوان اٹی صوبائی وزیر داخلہ میر ضیاء لانگو، چیف سیکرٹری بلوچستان شکیل قادر خان، ایڈیشنل چیف سیکرٹری داخلہ محمد حمزہ شفقات، انسپکٹر جنرل پولیس بلوچستان محمد طاہر خان، ڈائریکٹر جنرل بلوچستان سیف سٹی اتھارٹی محمد اشفاق، پرنسپل سیکرٹری وزیراعلیٰ عمران زرکون، سیکرٹری خزانہ جہانگیر خان، سیکرٹری آئی ٹی ایاز خان مندوخیل تون اوار ایلو تعلقدار کمامدارآک بشخ ہلکر۔