انتظامیہ نا کنڈ آن چاغی ٹی کس ءِ ہم کوکنار دسنگ نا موکل تننگپک،ڈی سی بختیار اسماعیل

چاغی، ڈپٹی کمشنر چاغی نا کنڈ آن کوکنار (تریاق) دسوک آتا برخلاف سخت کارروائی و ڈغار تے ضبط کننگ نا پڑو۔ ڈپٹی کمشنر چاغی بختیار اسماعیل ضلع چاغی نا کل زمیندار تے سختی اٹ خبڑدار کرسا پارینے کہ ضلع ٹی کس ءِ ہم کوکنار دسنگ نا موکل تننگپک، اگہ زمیندار اس کوکنار دسے تو اونا برخلاف سخت کانودی کارروائی کننگک‘ او دالبندین پریس کلب نا ڈل اتون تینا دفتر اٹی ہیت وگپ کرسا پارے کہ کوکنار دسنگ نا زموار بندغ آتا ڈغار تے ضبط کننگ تون اوار اوفتا برخلاف ایف آئی آر درج کننگک و کانود نا رِد اٹ اوفتا پن تے فورتھ شیڈول اٹی اوار کننگ نا کارروائی ہم کننگک۔ ڈپٹی کمشنر زمیندار تیا زور شاغا کہ او کوکنار کون آ کانود آن چَپ فصل نا جاگہ غا پیماز، خولم، کپاس، زیتون و ایلو فائدہ تروک کشاری فصل تا کشت و کشار ءِ اولیت ایتر، تاکہ نئے بیرہ زمیندار تے زرگزرانی فائدہ دوئی مرے بلکہ الس ءِ ہم فائدہ مرے و علاقہ نا کشاریزرگزران ءِ شون رسینگے‘او پارے کہ ضلع چاغی ٹی کانود آن چَپ فصل تے الیپننگ و کانودی و فائدہ تروک کشاری سرجز آتیکن انتظامیہ تینا زمواری تے سرایتک۔ (نامہ نگار)