ڈیہہ اٹ مدامگی امن، سوگوی و شونہالی کن سوگو اوغانستان المی ءِ،پاکستان / برطانیہ

اسلام آباد، پاکستان و برطانیہ دہشت گردی نا کل وڑو دروشم تا برخلاف اسیجائی ارادگی نا دوارگی ءِ کرسا دہشت گردی تور انا بشخ اٹی ہڑتوم آکنڈآن کمکاری ءِ پین سوگو جوڑ کننگ و ادارہ ئی رابطہ غاتے ودفنگ آ امنا کرینو ہڑتوم آ ملک آک دہشت گردی تون مون تننگ کن آزموندہ، گچین وڑوڈول و معلومداری تا ہل وتس تون اوار تین پہ تینی کمکاری ءِ برجا تخنگ نا ارادگی نا درشانی ءِ کرینو۔ ترجمان دفتر خارجہ نا رِد اٹ پاکستان و برطانیہ نا نیام اٹ سالانہ دہشت گردی تور مذاکرات اسلام آباد اٹی اڈ ہلک‘ ہراٹی ہڑتوم آ ملک آتا ڈل آک بشخ ہلکر؛ پاکستانی ڈل انا کماشی ءِ ڈائریکٹر جنرل کاؤنٹر ٹیررازم ڈاکٹر فریحہ بگٹی کرے، وخت اس کہ برطانوی ڈل اناکماشی ءِ ِ برطانوی دفتر خارجہ نا ڈائریکٹر تھامس بیری کرے۔ مذاکرات نا وخت آ پاکستان و برطانیہ نا نیام اٹ دہشت گردی تور انا بشخ اٹی برجا ہڑتوم آ کنڈ و کثیرالجہتی کمکاری نا جم جاچ ءِ ہلنگا۔ داوخت آ دہشت گردی نا پوسکن آ رجحان، بدل مروک گڑتی و جہانی و ڈیہہ انا سلامتی نا حالیت آ ہم گپ وتران کننگا‘ ہڑتوم آ ڈل آک دہشت گرد تنظیم آتیان مون گڑتی و اوفتتون مون تننگ کن اسیجائی کوشست آتا اہمیت آ زور شاغار‘ ترجمان دفتر خارجہ نا رِد اٹ مذاکرات اٹی اوغانستان و ہموڑے متحرک تحریک طالبان پاکستان (ٹی ٹی پی) تون اوار ایلو دہشت گرد ٹولی تا پدریسہ ساڑی گری و اوفتیاں ودی مروک خطرہ غاتیا ہم گڑتی نا درشانی کننگا۔ ہڑتوم آ ملک آک دا ہیت آ زور شاغار کہ ڈیہہ اٹی مدامگی امن، سوگوی و شونہالی کن اسہ سوگو و رکھوک ءُ اوغانستان اس المی ءِ۔ برطانوی ڈل پاکستان اٹی دہشتگرد جلہو تا سوب آن نہادی انسانی جان تا زیان آاست ہسونی نا درشانی ءِ کرے و دہشت گردی نا برخلاف جنگ اٹی پاکستان تون اوار سلنگ نا تینا ارادگی نا دوارگی ءِ کرے۔ برطانیہ ڈیہہ انا سوگوی و سلامتی کن پاکستان نا خذمت و کوشست آتے ہم امنا کرے۔