مڈ ٹرم گچین کاری،امریکی اپوزیشن جماعت ڈیموکریٹک پارٹی ءِ سینٹ اٹی گیشتری دوئی

واشنگٹن، امریکی کانگریس نا مڈٹرم گچین کاری تیٹی حزب اختلاف نا جماعت ڈیموکریٹس 100 باسکی سینٹ اٹی 51 نشست ہلسا گیشتری دوئی کرے وخت اس کہ 10 نشست آتا بننگ داسکان سلوک ءِ۔ بی بی سی نا رداٹ امریکہ نا مڈ ٹرم گچین کاری تیٹی حکمران جماعت ریپبلکنز ءِ ہڑتوم آ ایوان تیٹی شکست مون تروک ءِ۔۔ دا وخت ایوان بالا سینٹ اٹی اپوزیشن جماعت ڈیموکریٹس ءِ 51 باسک آتا پیدوار گیشتری دوئی مسنے و حکمران ریپبلکن پارٹی نا باسک آتا کچ 40 مسنے وخت اس کہ 9 نشست آتا نتیجہ غاتا بننگ داسکان سلوک ءِ۔ ایوانِ نمائندگان اٹی ہم حکمران جماعت 108 نشست دوئی کننگ کرینے وخت اس کہ ڈیموکریٹس 181 نشست آتتون بھاز مونی ہِننگ ءِ۔ نیویارک ٹائمز ءِ انٹرویو ٹی امریکہ نا صدر ڈونلڈ ٹرمپ پارے کہ او دا نتیجہ غاتیان پورو وڑاٹ مننگ کن تیار ءِ ومخالف جماعت آتتون کاریم کننگ کن امنا ءِ۔ صدر ٹرمپ مستی پارے کہ گمانی وڑاٹ نن جاگہ نہ جاگہ اس امنائی سلاہ اسکان سرمننگ کینہ۔ تینا سوشل میڈیا پلیٹ فارم ٹروتھ سوشل آ ٹرمپ پارے کہ اونا پن اینو نا بیلٹ پیپرآ الوکہ اگہ مسکہ تو نن بھلو گیشتری اسے ٹی کٹانہ۔دا گونڈ انگا لوز آتیان تاثر ملا کہ ٹرمپ تینا جماعت آن مُر مرسا ودوک آ گچین کاری بے سہبی تا زمواری ءِ ریپبلکن اومیتدار آتیا شاغانے۔ چندی ریپبلکن آک مہالو آن مڈ ٹرم گچین کاری تا بابت ٹرمپ نا وڑ تیا خار درشان کرینو۔ ایوانِ نمائندگان اٹی گیشتری نا دروشم اٹ ڈیموکریٹس ٹرمپ او اونا خاہوت نا وائٹ ہاؤس اٹی پدی بننگ آن پد مروک آ مالی سرجزآتا بابت چندی جاست وپاست آتا بناءِ کننگ کیک۔ او ایران تون جنگ انا بناءِ کننگ کون آ جھیڑہ ئی فیصلہ غاتا ہم جاچ ءِ ہلنگ کیک۔ او ٹرمپ نا برخلاف مسٹمیکو وار مواخذہ نا کوشست ہم کننگ کیک، ولے دا ہم مننگ کیک کہ اونا چکار انتظامیہ نا گڑاس وزیر تا کنڈآ زیات مرے۔ دا حالیت آک بروک آ اِرا سال اٹی ڈونلڈ ٹرمپ نا سیاسی ایجنڈا وڈٹ آتیا نمان زہم شاغنگ کیرہ۔