وکیل آک آن لائن لرننگ پروگرام و پوسکنوڑ ٹیکنالوجی آن فائدہ ہرفر،چیف جسٹس پاکستان

اسلام آباد، بلوچستان تون تعلقدار 51 باسکی وکیل آتا ڈل سپریم کورٹ اسلام آباد اٹی چیف جسٹس پاکستان جسٹس یحییٰ آفریدی تون اوڑدہی کرے۔ دا ڈل فیڈرل جوڈیشل اکیڈمی (ایف جے اے) اٹی برجا کنٹینیونگ لیگل ایجوکیشن (سی ایل ای) پروگرام اٹی بشخ ہلنگ اٹی ءِ۔ وکیل آتے بلوچستان بار کونسل مچ آ صوبہ نا بار ایسوسی ایشن تیان پن کرینے‘ ہرافتے ٹی صحبت پور، اوستہ محمد، پشین، بارکھان، زیارت، قلات، تربت، کوئٹہ، نوشکے، قلعہ سیف اللہ، ژوب، چمن، خضدار، واشک، لورالائی، دکی، پنجگور، مستونگ، بسیمہ، جعفرآباد، شیرانی، نصیرآباد و سیوی اوار ءُ۔ چیف جسٹس شریدار آتے است انا ہُب اٹ بخیر کرے و وکیل آتا کسبی لائخی ءِ ودفنگ کن ایف جے اے نا گام گیج نا ستاءِ کرے۔ چیف جسٹس اوفتے خواری اٹ علم دوئی کننگ، کسبی اخلاق ءِ برجا تخنگ و دوئی کروک آ علم ءِ گچین کانودی پریکٹس اٹی بدل کننگ نا است بڈی ءِ کرے۔ اوفتے ایف جے اے و عدلیہ پاکستان نا سفیر گوندسا پارے کہ او تینا ہیل کروک علم ءِ ایلو وکیل آتتون شیئر کیر و انصاف نا نظام آ السی پت ءِ سوگو کننگ اٹی تینا کڑد ءِ ادا کیر۔ عدالتی انفراسٹرکچر اٹی پیشرفت آ ہیت کرسا چیف جسٹس شریدار آتے معلومدار کرے کہ ایکسس ٹو جسٹس ڈویلپمنٹ فنڈ انا رد اٹ جوڈیشل کمپلیکسز بار روم اسکان سولرائزیشن، انٹرنیٹ کنیکٹیویٹی اتون ای لائبریری، سفا انگا کنوئی آ دیرو زالبول آتیکن جتا کروک آسراتی تے ودفنگانے‘ دا ڈٹ بھلو حد اسکان پورو مسنے، بیرہ شش جوڈیشل کمپلیکس آٹ تکنیکی سوب آن کاریم سلوک ءِ۔ چیف جسٹس وکیل آتیا زور شاغا کہ او دا آسراتی تا پبی کاریم اٹ اتنگ ءِ کیر و کسبی چاہنداری ءِ ودفنگ کن ایف جے اے نا آن لائن لرننگ پروگرام و پوسکنوڑ ٹیکنالوجی آن فائدہ ہرفر۔ پاکستان نا نظامِ انصاف نا سوگوی نا ذکر ءِ کرسا چیف جسٹس پارے کہ سختی نا وخت آتے ٹی عدالت آتا پدریسہ کاریم کننگ و انصاف نا فراوانی عدالتی ادارہ غاتا سوگوی و ارادگی نا ڈیک ءِ کیک۔ او کانود نا حکمرانی ءِ برجا تخنگ اٹی عدالتی افسر و کانودی برادری نا باسک آتا است خواہی و سوگو سلنگ نا ستاءِ کرے۔