قومی اسمبلی ٹی امنائی قرارداد منظور،تہار دے نا رد اٹ کشمیری الس نا آجوئی نا جہد انا پبی مخ تفی نا ارادگی

اسلام آباد، قومی اسمبلی تہار دے کشمیر نا وخت آ کشمیری الس نا آجوئی ناجہد انا پبی مخ تفی نا دوارگی ءِ کرسا امنائی وڑ اٹ قرارداد منظور کرینے۔ قرارداد اٹی 27 اکتوبر 1947ء آ بھارتی فوج انا مقبوضہ کشمیر اٹی پترینگ انگ ءِ بھارتی بیدادی نا تہار ءُ دے اس گوندسا مسئلہ کشمیر ءِ اقوامِ متحدہ نا قرارداد آتا رِد اٹ ایسر کننگ، کشمیری الس ءِ حقِ خودارادیت تننگ و مقبوضہ دامان اٹ انسانی حق آتا خلاف ورزی تے بند کرفنگ نا خواست کننگا۔ قومی اسمبلی نا دیوان ڈپٹی اسپیکر غلام مصطفی شاہ نا کماشی ٹی اڈ ہلک۔ تہار دے کشمیر نا رد اٹ قرارداد آتے بنجائی وزیر امیر مقام اردو اٹی وخت اس کہ رانا قاسم نون انگریزی ٹی پیش کرے‘ ہرافتے ایوان امنائی اٹ منظور کرے۔ قرارداد آتیٹی کشمیری الس تون پورو یکجہتی نا درشانی ءِ کرسا اوفتا قربانی تے خراجِ تحسین پیش کننگا و جہانی برادری آ زور شاغنگا کہ او مقبوضہ کشمیر اٹی انسانی حق آتاخلاف ورزی تا نوٹس ءِ ہلیر و کشمیری الس ءِ اقوامِ متحدہ نا قرارداد آتا رِد اٹ حقِ خودارادیت رسیفنگ کن تینا کڑد ءِ ادا کیر۔ قومی اسمبلی دا ارادگی نا دوارگی ءِ کرے کہ پاکستان کشمیری الس نا سیاسی، اخلاقی و سفارتی مخ تفی ءِ برجا تخک و مسئلہ کشمیر نا انصاف اٹ و پرامن ایسری کن تینا کوشست آتے برجا تخک۔ دا وخت آ بنجائی وزیر امیر مقام پارے کہ 80 سال مست بھارتی فوج مقبوضہ کشمیر اٹی پترینگا و بھارت کانود آن چَپ کشمیر آ کوزہ کرے۔ اونا رِد اٹ مقبوضہ کشمیر اٹی کساس اِرا لکھ اُرا تے بھس کننگانے۔ او معلومدار کرے کہ تہار دے کشمیر نا رد اٹ اسہ بھلو ریلی و جلسہ اس ہم اڈ تننگا۔