قلعہ سیف اللہ ٹی سرسہب کارروائی فورس آتا بھرمی حکمت عملی نا شاہدی ءِ،وزیر داخلہ بلوچستان

کوئٹہ، صوبائی وزیر داخلہ بلوچستان میر ضیاء اللہ لانگو قلعہ سیف اللہ ٹی سیکورٹی فورس آتا کنڈ آن کروک سرسہب کارروائی نا ستاءِ کرسا پارینے کہ دا انٹیلی جنس بیسڈ آپریشن صوبہ ٹی دہشت گردی نا پورو چٹفنگ کن ننا بھرمی حکمت عملی نا روشنا شاہدی ءِ۔ تینا اسہ اہم ءُ بیان اسے ٹی صوبائی وزیر داخلہ میر ضیاء اللہ لانگو پارے کہ کارروائی ناوخت آ دہشتگرد آتا اہم انگا کمانڈر نا خلنگ انگ امن دشمن آتیکن اسہ پیدوار و پراثر ءُ کلہو اسے کہ بلوچستان نا ڈغار آ ملک دشمن آتیکن ہچ ءُ جاگہ اس اف۔ سیکورٹی فورس آک تینا شانی آ کسبی لائخی و وخت آ گام گیج آن دہشتگرد آتا پراگندہ غا ارادہ غاتے مِش تا کریر۔ او پارے کہ بلوچستان اٹی امن و ایمنی نا بحالی و دہشت گردی نا چٹفنگ کن سیکورٹی ادارہ غاتا پدریسہ کوشست و قربانیک بے کچ ستا کڑزرہ ولے صوبہ ٹی مدامگی و آخبتی امن کن بیرہ دہشتگرد آک آخا بلکہ اوفتا کل نیٹ ورک، کمکار و مخ تف آتا برخلاف ہم بے پرفرق و بھرم تروک کارروائی المی مسنے۔ وزیرداخلہ دا ہیت انا دوارگی ءِ کرے کہ دہشت گردی نا برخلاف دا قومی جنگ اٹی صوبہ نا غیرتی الس و مچ آ قوم تینا سیکورٹی فورس آتتون ہم کوپہ سلوک ءِ۔ بلوچستان نا شاری تا جان و مال انا رکھ و سلامتی حکومت بلوچستان نا اولیکو و بنداوی اولیت ءِ۔ او مستی زورشاغسا پارے کہ بلوچستان نا آخبتی شونداری‘ زرگزرانی شونہالی و سیاسی و انتظامی سوگوی نا دارومدار بیرہ وبیرہ دہشت گردی نا پورو چٹفنگ ءِ‘ و حکومت دا مسخت نا دوئی کننگ اسکان امن دشمن آتا رند ءِ الیپک۔