دہشت گردی نا برخلاف جنگ اٹی سیکورٹی فورس آتا کسبی چاہنداری، سنبرینگوک سلنگ و نزور مفروک جیرت ستا کڑزک، وزیراعلیٰ بلوچستان

قلعہ سیف اللہ، کوئٹہ، سیکورٹی فورس آتا بلوچستان اٹی آپریشن ردالفتنہ 3 نا رد اٹ دہشتگرد آتا برخلاف پبی کارروائیک برجا ءُ و سیکورٹی حوالی تا رِد اٹ سیکورٹی فورس آک قلعہ سیف اللہ ٹی انٹیلی جنس بیسڈ آپریشن اٹی فتنہ الخوارج نا دہشتگرد کمانڈر عادل شاہ عرف درویش ءِ جہنمی کریر۔ حوالی نا رد اٹ دہشتگرد کمانڈر دسمبر 2020ء آن فتنہ الخوارج تون گنڈوک ئس و 2024ء آن دہشت گرد ٹولی نا مالی باندات آتا چاروکی ءِ کریکہ‘ دہشتگرد کمانڈر پیشن نا دہشتگرد آتے ژوب، شیرانی و شعبان اٹی مدامگی ہنکین فراوان کننگ اٹی کمک فراوان کریکہ‘ سیکورٹی حوالی نارد اٹ خارجی عادل شاہ عرف درویش 2022ء و 2023ء آن سیکورٹی فورس آتیا جلہو و تاوان کن بندغ آتا برمتہ کن بھتہ خوری نا زموار ئس، خارجی کمانڈر نا برخلاف دہشت گردی تور انا عدالت آتیٹی 19 ایف آئی آر ئسر و اونا کاٹم نا نہاد 25 لکھ روپئی پک کروک ئس۔ سیکورٹی فورس آتا بلوچستان اٹی دہشتگرد آتا برخلاف کارروائیک گڈیکو دہشتگرد نا چٹفنگ اسکان برجا سلرہ۔ وزیراعلیٰ بلوچستان میر سرفراز بگٹی قلعہ سیف اللہ ٹی انٹیلی جنس بیسڈ آپریشن نا وخت آ فتنہ الخوارج نا اہم دہشتگرد کمانڈر نا خلنگ آ سیکورٹی فورس آتاکارروائی نا ستاءِ کرسا پارینے کہ دہشت گردی نا برخلاف جنگ اٹی سیکورٹی فورس آتا کسبی چاہنداری، سنبرینگوک مننگ و نزور مفروک جیرت ستا کڑزک۔ وزیراعلیٰ پارے کہ بلوچستان اٹی آپریشن ردالفتنہ 3 نا رد اٹ دہشتگرد آتا برخلاف برجا کارروائیک دہشت گردی نا پورو چٹفنگ نا ارادگی نا ڈیک ءُ۔ دہشت گرد آتا برخلاف کارروائی تا کمک اٹ اوفتا نیٹ ورک و کمکار آتا برخلاف گام گیج آتا اہمیت پین پیدوار مریک۔ میر سرفراز بگٹی پارے کہ دہشت گردی نا برخلاف جنگ اٹی سیکورٹی فورس آتا قربانی و خذمت آک ستاکڑزرہ۔ دہشت گردی اسہ بھلو چیلنج اسے ہراڑتون مون تننگ کن دہشتگرد آتتون اوار اوفتا مالی کمکار ومخ تف آتا برخلاف ہم کارروائیک المی ءُ۔ وزیراعلیٰ بلوچستان پارے کہ صوبہ ٹی امن و سوگوی و الس نا جان و مال انا رکھ حکومت نا زمواری ءِ۔ دہشت گردی نا برخلاف جنگ اٹی سیکورٹی فورس آتاقربانی تے مچ آ قوم شرف ایتک و قوم تینا بہادر آ ورنا تتون سلوک ءِ۔ میر سرفراز بگٹی دا ارادگی نا درشانی ءِ کرے کہ بلوچستان اٹی دہشت گردی نا پورو چٹفنگ، مدامگی امن و الس نا رکھ اکن جہد برجا سلک۔