وزیراعظم شہباز شریف نااِرا سال اٹ 5 لکھ سرکاری اسکول و مدرسہ غاتا طالب علم ءِ کروم بکس تننگ نا پڑو

اسلام آباد، وزیراعظم محمد شہباز شریف مچ آ ملک انا سرکاری اسکول و دینی مدرسہ غاتا پنچ لکھ مار و مسڑ طالب علم آتے کروم بکس فراوان کننگ نا پروگرام نا بناءِ کرسا پڑو کرینے کہ دا پوسکنوڑ ڈیجیٹل ازباب آک بروک آ اِرا سال اٹ طالب علم آتسکان سرمریرہ‘ او پارے کہ حکومت ورناتے پوسکنوڑ تعلیم و ٹیکنالوجی آن شُپ کننگ کن کل المی وسیلہ غاتے فراوان کیک تاکہ او آخبت نا خواست آتتون ہم گرنچ مرسا پاکستان نا شونداری و شونہالی ٹی تینا پبی کڑد ءِ ادا کیر۔ اسلام آباد نا کنونشن سینٹر اٹی اڈ ہلوک دود آن تران کرسا وزیراعظم پارے کہ کروم بکس آتا بشخ و پانٹ اٹی بیرہ میرٹ، خواری و لائخی ءِ بنداو جوڑ کننگانے۔ دا پروگرام نا رد اٹ مار و مسڑ طالب علم آتے کروم بکس اتون اوار بیگ و انٹرنیٹ نا آسراتی فراوان کروک آ مائی فائی ڈیوائس ہم تننگ انگ ءِ ہرافتا کمک اٹ او اُراتیٹی تولسا ای لائبریری و مچ آ دنیا ٹی دوئی تعلیمی وسیلہ غاتیان فائدہ ہرفنگ کیرہ۔ وزیراعظم پارے کہ پوسکنوڑ ٹیکنالوجی اسکان رسینگ گیگ ورنا تیکن علم انا پوسکن آ درگہ غاتے ملک و اوفتے جہانی کہول آ تینا لائخی تے منفنگ نا لائخ جوڑ کیک۔ او پارے کہ تعلیم ہمو مڈی ءِ ہرادے کس اس پُلنگ کپک، وخت اس کہ لائخی و خواری بندغ ءِ راج اٹی نمان ءُ ہند اس ایتک۔ وزیراعظم شہباز شریف پارے کہ مسلم لیگ (ن) نا مستین نا دورِ حکومت اٹی نواز شریف نا کماشی ٹی گلگت بلتستان و آزاد کشمیر تون اوار مچ آ ملک انا شش لکھ ورنا ءِ میرٹ نا بنداو آ لیپ ٹاپ فراوان کننگاسس۔ دا پروگرام نا کمک اٹ حقدار و غریب طالب علم آتے ہم مونی ہننگ نا وارخواہی رسینگا انتئے کہ ذہانت و خواری نا تعلقداری کس انا مالی حیثیت تون مفک۔ او پارے کہ مستین اٹی شش لکھ لیپ ٹاپ دہ سال انا مد اٹی بشخنگاسر، وخت اس کہ ساڑی پروگرام نا رد اٹ پنچ لکھ لائخ آ مار و مسڑ طالب علم آتے بیرہ اِرا سال اٹی کروم بکس فراوان کننگ نا ہدف پک کننگانے۔ وزیراعظم کورونا نا دین ناوخت آ طالب علم آتے فراوان کروک آ لیپ ٹاپ آتا ذکر ءِ کرسا پارے کہ دا ازباب آک تعلیم ءِ برجا تخنگ اٹی اہم کڑد ادا کریر و کیہی طالب علم آک تینا خواننگ ءِ پورو کرسا ڈاکٹر، انجینئر و ایلو بشخ آتا پروفیشنل جوڑ مسر۔ او اومیت درشان کرے کہ پوسکن آ اسکیم ہم ورنا تا تعلیمی و کسبی شونداری ٹی کمکار مریک‘ وزیراعظم کروم بکس انا فراوانی کن ڈونیشن تروک ٹوکیو کیئر فاؤنڈیشن نا بانی راشد منہاس و اونا ٹیم انا خصوصی منت واری ءِ ہرفے۔ او پارے کہ پیشن ملک رہینگوک پاکستانیک دے و نن خواری کرسا ملک انا پن ءِ روشنا کیرہ و دا ڈٹ اٹی اوفتا کمک پاکستانی ورنا تا لائخی تیا پت انا درشانی ءِ۔ دود آن تران کرسا وزیراعظم یوتھ پروگرام نا چیئرمین رانا مشہود احمد خان پارے کہ وزیراعظم شہباز شریف ورناتے شرف تننگ، اوفتا است بڈی کننگ و اوفتے گچین آخبت نا وارخواہی فراوان کننگ نا خواہندار ءِ۔ او پارے کہ فاؤنڈیشن نا کنڈ آن پنچ لکھ کروم بکس انا فراوانی ورنا تے ڈیجیٹل آسراتی تتون گنڈنگ نا کنڈ آ اہم ءُ گام اسے۔ وزیراعظم نا پارت آ طالب علم آتے انٹرنیٹ نا آسراتی ہم تننگ انگ ءِ۔ او پارے کہ اسہ مائی فائی کنکشن اسے آن پنچ پین طالب علم ہم فائدہ ہرفنگ کیرہ۔