ریاض ایئرپورٹ آ اِرا ہفتہ غان پد جہاز آک بحال، حوثی تا ولدا دھڑکو

ریاض، سعودی عرب نا دارالحکومت ریاض اٹی کنگ خالد انٹرنیشنل ایئرپورٹ پڑو کرینے کہ اینو آن اونا ہڑتوم آ ٹرمینلز آتیان ملک و پیشن ملک پرواز آک دوارہ بنا کیرہ‘ ایئرپورٹ انتظامیہ نا رِد اٹ ٹرمینل ون ملک پرواز آتیکن وخت اس کہ ٹرمینل ٹو سعودی فضائی کمپنی تا جہانی پرواز آتیکن پن کننگانو‘ برطانوی نشریاتی ادارہ نا رِد اٹ پرواز آتا چاروکی کروک ویب سائٹ فلائٹ ریڈار نا معلومداری آن پک مس کہ یکش نبے نا سہب انا ریاض ایئرپورٹ آن اسہ جہاز اس جدہ کن راہی مس۔ اکتوبر اٹی یمن نا حوثی جنگجوڑو آتا جلہو نا سوب آن ایئرپورٹ آ فضائی آپریشن خراب وڑ اٹ زہمی مسوسس، حوثیک 10 اکتوبر آ مروک اسہ جلہو اسے نا زمواری ءِ ہرفیسر، ہراٹی 13 بندغ زوال و 300 آن زیات ٹھپی مسوسسر۔ پرواز آتے بحال کننگ نا پڑو آن پد ہم حوثی تا عسکری ترجمان یحییٰ سریع ایئر لائنز، ایئرپورٹ نا کارندہ و مسافر آتے اسہ وار ولدا ریاض ایئرپورٹ ءِ کاریم اٹ اتپننگ نا دھڑکو تسنے‘ ایلو کنڈ آ سعودی عرب نا محکمہ شہری دفاع پیدوار کرینے کہ اینو سہب انا قومی ہلہلہ ئی نظام نا کمک اٹ ریاض نا الس ءِ گمانی خطرہ غان آگاہ کننگ نا بابت ڈہ کننگاسس۔