فتنہ الخوارج نا دہشت گرد کمانڈر نا خلنگ انگ بھلو سرسہبی اسے ،خصوصی کمکار شاہد رند

کوئٹہ، وزیراعلیٰ بلوچستان نا کمکار حوالکاری و سیاسی باندات شاہد رند قلعہ سیف اللہ ٹی انٹیلی جنس بیسڈ آپریشن نا وخت آ دہشت گرد کمانڈر نا خلنگ آ سیکورٹی فورس آتا کارروائی نا ستا ءِ کرسا پارینے کہ بلوچستان اٹی دہشتگرد آتا برخلاف فیصلہ ئی کارروائیک سیکورٹی فورس آتا کسبی چاہنداری، سنبرینگوک مننگ و بھرم تروک حکمت عملی نا شاہدی ءُ۔ شاہد رند پارے کہ فتنہ الخوارج نا دہشت گرد کمانڈر نا برخلاف سرسہب کارروائی امن دشمن عنصر آتا ارادہ غاتے بے سہب کننگ و دہشت گردی نا نیٹ ورک آتا برخلاف گام گیج آتا اہمیت ءِ پاش کیک۔ دہشت گردی نا برخلاف جنگ اٹی سیکورٹی فورس آتا وخت آ کارروائی و کسبی لائخیک ستا کڑزرہ۔ کمکار وزیراعلیٰ پارے کہ بلوچستان اٹی دہشت گردی نا ناچوڑ نا چٹفنگ کن سیکورٹی فورس آتاقربانی و خذمت آک ستا کڑزوک ءُ۔ دہشت گرد آتتون اوار اوفتا کمکار و خڑک اناتا برخلاف ہم بے فرق کارروائی تے برجا تخنگ امن و سوگوی کن المی ءِ۔ شاہد رند پارے کہ سیکورٹی فورس آتاسرسہب کارروائیک بلوچستان اٹی مدامگی امن نا ارادگی ءِ پین سوگو کیرہ۔ صوبہ نا الس امن و شاری تا جان و مال انا رکھ اکن سیکورٹی فورس آتا قربانی تا شرف ءِ کیک۔ او دا ارادگی نا درشانی ءِ کرے کہ بلوچستان آن دہشت گردی نا پورو چٹفنگ و امن نا برجائی اسکان دہشت گرد آتا برخلاف کارروائیک بایدے برجا تخنگر۔