بلوچستان نا قبائلی سڑدار آک مخلوق نا جان و عزت آتا رکھ ءِ پک کرینو،سرداران ساراوان

کوئٹہ، سرداران سراوان و قبائلی متبر و متبر نواب محمد خان شاہوانی، سردار کمال خان بنگلزئی اسک پارینو کہ قبائلی سردار آک مخلوق نا جان و عزت آتا رکھ ءِ پک کرینو‘ اگہ کس اس پراگندہ ءُ کاریم اس کیک تو دا اونا تینا گام اس مننگ کیک‘ اسمبلی ٹی قرارداد اتسا سرداری نظام ءِ چٹفنگ مفک، دا کاریم کم عقلی اس مننگ کیک انتئے کہ اسمبلی ٹی تولوک نمائندہ غاک اسہ نہ اسہ قبیلہ سے آن تعلقدار مریرہ۔ رٹ ءِ برجا تخنگ سردار تا آخا بلکہ حکومت و ریاست نا زمواری ءِ کہ او الس ءِ رکھ فراوان کرسا دمدستی و اڑزان انصاف فراوان کیر، ولدا اوکان پد قبائلی اسے نظام نا بدلی کن گام گیج کیر۔ داخیال آتا درشانی ءِ او یک شنبے نادے بنگلزئی ہاؤس سریاب اٹی اڈ ہلوک جرگہ غان پد اسیجائی پریس کانفرنس آن تران کرسا کریر، دا وخت آ سردار زادہ میر اشرف خان ساتکزئی، سردار محمد عاصم سرپرہ، سید علی محمد شاہ وایلوفک ہم ساڑی ئسر۔ نواب محمد خان شاہوانی پارے کہ اسمبلی ٹی سرداری و نوابی نظام ءِ چٹفنگ نا بابت قرارداد اتنگانے ہرا کم عقلی اس مننگ کیک‘ نوابی و سرداری نظام سد آ سال آتا متکن ءُ نظام اسے، قوم انا سروک سردار مریک، دا ہچ ءُ عہدہ اس اف بلکہ دا اسہ خاہوتی نظام اسے ہرا پشت آتیان برسا کننگ ءِ، سد آ سال آتا تاریخ ءِ، ویل آتے ایسر کننگ و دمدستی انصاف فراوان کننگ کن فیصلہ کیرہ تاکہ فریق آتا رضامندی اٹ فیصلہ کرسا جھیڑہ و جنگ آن بچفنگ کن تینا کڑد ءِ ادا کیر، دا نظام ءِ چٹفنگ مفک، کل سردار آک ظالم افس، سردار آک قبائلی فیصلہ غاتا کمک اٹ ہزار آ بندغ آتے کُشت و خون آن بچفینو، اگہ اسہ اِرا واقعہ ٹی تینٹ سردار یا اونا کارندہ اس زموار مرے تو دا گام آن نظام ءِ قصور وار تکنگ مفک بلکہ دا بیرہ اسہ بندغ اسے نا جند انا کاریم مننگ کیک۔ او پارے کہ نن عالم آتا شرف ءِ کینہ‘ اگہ اسہ بندغ یا حکومتی نمائندہ، مولوی یا مقتدرہ نا افسر اس تینا وڑ اٹ گام اس ہرفک تو نن ادارہ یا کل بندغ آتے رد پاننگ کپنہ، اگہ کس اس تینٹ ردینک کیک تو مچ آ نظام و برادری ءِ رد پاننگ مفک، تینا پسند و ناپسند ءِ سرداری نظام نا حساب اٹی شاغنگ کپنہ، نظام اسہ جاگہ غا ہم رد مفک، اودے چلیفوک آک رد مننگ کیرہ، دا اسہ عجب ءُ باندات اسے سٹی ہرفنگ انگ ءِ گڑا پگہ غا بلوچی و براہوئی آ ہم رکھ خلنگک؟ ہرا کہ جوان ءُ عمل اس اف‘ ہرا کس ہرا گام ءِ ہرفینے اونا برخلاف کارروائی کننگے‘ رسمی و رواجی سردار زند و تینا مخلوق نا عزت ءِ بچفک و ایلوفتے شرف ایتک‘ سردار نا کل فیصلہ غاک ہڑتوم آ فریق آتا کل انا رضامندی اٹ کننگرہ ہراٹی بندغ آتے اوفتا حیثیت و جھیڑہ غاتے مستی ودنگ آن توننگ کن ڈنڈ کننگک تاکہ ڈنڈ تفننگ آ جھیڑہ مستی تالان مف‘ او پاریر کہ پوسکن ڈویژن جوڑ کننگ ہرا جاگہ نا انصاف ءِ؟ نظام ءِ بدل کروک آ دا علاقہ ناس اف، ببو نن تون تولبو نواب انگریز نا تروک آ خطاب ءِ، ہر قبیلہ نا تینا اسہ پنجر اس مریک، ننے چٹفنگ مننگ کپک‘ سرداری نظام مگہ ملک انا فائدہ اٹی اف؟