پاکستان زرگزران نا ڈیجیٹلائزیشن و میرٹ و شفافیت نا مونی دننگ کن کاریم کننگ اٹی ءِ،وزیراعظم محمد شہباز شریف

اسلام آباد، وزیراعظم محمد شہباز شریف پارینے کہ پاکستان ادارہ ئی اقتصادی جوانی اتنگ، زرگزران نا ڈیجیٹلائزیشن و میرٹ و شفافیت نا مونی دننگ نا وڑ، زرگزرانی شوندار ی و شونہالی نا دوئی کننگ کن پبی کوشست کننگ اٹی ءِ۔ جمعہ نادے وزیراعظم آفس نا میڈیا ونگ آن جاری پریس ریلیز نا رداٹ وزیراعظم محمد شہباز شریف تون جہانی سلابتی فرم ”الویریز اینڈ مارسل (اے اینڈ ایم)” نا قطبی امریکہ نا آپریشنز نا منیجنگ ڈائریکٹر پیٹر بریگز تینا ڈل اتون اوار اوڑدہی کرے۔ وزیراعظم منیجنگ ڈائریکٹر و ڈل ءِ بخیر کرسا دا ارادگی نا درشانی ءِ کرے کہ پاکستان تینا زرگزران ءِ جہانی منڈی تیکن پین ملنگ و جہانی کہول آ امنا مروک اقتصادی چاہندار آتتون سلابت کن سنبرینگوک ءِ۔ وزیراعظم پارے کہ اقتصادی و مالیاتی سوگوی نا مشکل ہدف سرسہبی اٹ دوئی کننگ آن پدحکومت کڑمب و بنداوی وڑ انا ادارہ ئی اقتصادی اصلاحات کن گچین گام گیج کننگ ءِ، دا گام گیج آتا مسخت برآمد آ تیا تالان شونداری و پیداواری زرگزران نا پوسکن آ دور انا بناءِ پک کننگ ءِ۔ وزیراعظم دا ہیت ءِ ہم کرے کہ حکومت قومی صنعت و پیداوار نا بشخ انا کارکڑد و کاریم ناکچ اٹی ودکی کن خاص چکار کننگ ءِ وخت اس کہ دراست درملکی زرکاری (ایف ڈی آئی) ءِ اتنگ کن ہم گچین گام گیج کننگ انگ ءِ۔ او ڈل ءِ پارے کہ حکومت سرکاری ملکیتی ادارہ (ایس او ایز) نا زرگزرانی فائدہ و مدامگینا جاچ ءِ ہلنگ کن اسہ فعال حکمت عملی اسے آ کاریم کننگ ءِ ہرانا رداٹ قومی زرگزران نا گچینی و اقتصادی شوندار ی کن دا ادارہ غاتا پرائیویٹائزیشن نا کسر ءِ تینائی کننگ انگ ءِ۔ وزیراعظم دا ہیت آ خاص زور شاغاکہ حکومت زرگزرانی شوندار ی نا عمل ءِ گچین و ترند رفتار جوڑ کننگ کن چاہندار آتا ٹیم و کسبی وڑاٹ اہل ہیومن ریسورس نا اہمیت آن جوانی اٹ معلومدار ءِ۔ او پارے کہ ہندا رداٹ پاکستان اقتصادی شونداری ءِ پین سوگوکننگ کن گچین، زموارو فعال جہانی سلابتی فرم آتتون بھرم تروک و بامعنی شریداری کن تیار ءِ۔ الوریریز اینڈ مارسل نا قطبی امریکہ نا آپریشنز نا منیجنگ ڈائریکٹر پیٹر بریگز اوڑدہی نا وخت تننگ آ وزیراعظم نا است انا ہب اٹ منت ءِ ہرفے۔ او دراست درملکی زرکاری نا مونی دننگ و جہانی اقتصادی چاہندارآتتون مثبت رابطہ غاتا جوڑ کننگ کن حکومت پاکستان نا ارادگی نا ستاءِ کرے۔ پیٹر بریگز پاکستان اٹی کاروبار کن سازگار چاگڑدنا مونی دننگ و اسہ پیداواری زرگزران اسے نا جوڑ کننگ کن تینا فرم انا کنڈآن پاکستان تون گچین رابطہ کاری و کمکاری ٹی است خواہی نا درشانی ءِ ہم کرے۔ اوڑدہی ٹی بنجائی وزیر خزانہ محمد اورنگزیب، بنجائی وزیر اقتصادی باندات احد خان چیمہ، بنجائی وزیر توانائی سردار اویس احمد خان لغاری، وزیراعظم نا خصوصی کمکارسید طارق فاطمی، وزیراعظم نا سلاہکار پرائیویٹائزیشن محمد علی و ایلو بڑزکوسرکاری کمامدارآک بشخ ہلکر۔ پیٹر بریگز تون اوار الویریز اینڈ مارسل نا دبئی ٹی منیجنگ ڈائریکٹر ڈاکٹر رضا باقر، لندن اٹی منیجنگ ڈائریکٹر طارق حمید و استنبول اٹی منیجنگ ڈائریکٹر اونور اوکوتور اسک ہم ساڑی ئسر۔