سرکاری خذمت آتا فراوانی کن چنکو انتظامی یونٹ جوڑ کننگ المی ءِ،وزیراعلیٰ میر سرفراز بگٹی

قطبی ڈیرہ بگٹی، وزیراعلیٰ بلوچستان میر سرفراز بگٹی پارینے کہ کوہ سلیمان ڈویژن نا کل ڈویژنل پوسٹ آتا منظوری تننگانے و اوفتیا افسر و کارندہ غاتا تعیناتی زوت عمل اٹ اتنگک۔ بلوچستان اٹی الس ءِ اوفتا درگہ غا سرکاری خذمت آتا فراوانی ءِ پک کننگ کن چنکا انتظامی یونٹ آتا جوڑ کننگ المی ءِ، صوبہ ٹی پوسکن آ صوبہ غاتتون اوار چنکو ڈویژن و ضلع جوڑ کننگ نا ہم گرج ءِ تاکہ سول حکومت و سرکاری محکمہ غاتسکان الس نا رسینگ گیگ آسان جوڑ کننگ مرے۔ دا خیال آتا درشانی ءِ او قطبی ڈیرہ بگٹی ٹی پریس کانفرنس آن تران کرسا کرے۔ وزیراعلیٰ پارے کہ ملک اٹی چنکا انتظامی یونٹ آتا جوڑ کننگ نا شرہ داسہ بنا کرینے‘ وخت اس کہ او بلوچستان نا خاص انگا حالیت و السی گرج آتے مون آ تخسا دا عمل آ اِرا سال مست کاریم نا بناءِ کریسس۔ او پارے کہ انتظامی پنجر ءِ دا وڑ اٹی ٹہیفنگ المی ءِ کہ ریاستی ادارہ و سول حکومت نا ساڑی گری الس آن خڑک مرے و الس ءِ سرکاری باندات نا رد اٹ مشکل مون تروئی تمپ۔ وزیراعلیٰ میر سرفراز بگٹی پارے کہ رکھنی ہیڈ کوارٹرز ءِ بلوچستان نا مثالی ءُ ڈویژن اس جوڑ کننگ و شونداری نا پڑ اٹ نمان ہند تننگ کن گام گیج آک برجا ءُ۔ او پارے کہ رکھنی ہیڈ کوارٹرز ءِ ڈویژن نا درجہ بایدے بھاز مست تننگوسس ولے داسہ شونداری نا عمل نا بنا مسنے۔ او پیدوار کرے کہ رکھنی ٹی شونداری کاریم تے وڈی خوری مافیا و کمیشن نا لعنت آن پاک تخنگ کن سخت پارت جاری کننگانو، وخت اس کہ محکمہ مواصلات و تعمیرات تینٹ شونداری ڈٹ آتیا عملدرآمد کننگ اٹی ءِ تاکہ شفافیت ءِ پک کننگ مرے۔ وزیراعلیٰ پارے کہ حکومت نا کوشست ءِ کہ رکھنی ءِ ہندن ءُ مثالی ءُ ڈویژن ہیڈ کوارٹر اس جوڑ کننگے ہراڑے شونداری ڈٹ آک شفاف وڑ اٹ پورو مریر و الس ءِ اوفتا فائدہ دوئی مرے۔