گوادر اٹی دہشت گردی نا کوشست بے سہب، نیاڑی سے تون اوار 10 دہشت گرد خلنگار،آئی ایس پی آر

راولپنڈی، بلوچستان اٹی گوادر نا علاقہ گبد بارڈر کراسنگ و گوادر شار اٹی بھارتی کاٹم خواجہی ٹی کاریم کروک فتنہ الہندوستان نا دہشتگرد آتا کنڈ آن دہشت گردی نا کارروائی تا کوشست بے سہب کننگا، سیکورٹی فورس آک جتا جتا جنگ اٹ اسہ زالبول دہشتگرد اسے تون اوار 10 دہشتگرد ءِ خلکر‘ وخت اس کہ جلہو اٹ اسہ شاری اس شہید مس و منہ گاڈی ءِ نسخان رسینگا۔ پاک فوج انا شعبہ تعلقات عامہ (آئی ایس پی آر) نا رِد اٹ دہشتگرد آک ہمو ہند آتے شست کننگ نا کوشست کریر ہراڑے کارروائی تیان ہمو بندغ آتے نسخان رسینگ نا گمان ئس ہرافتا نمائندگی نا او دعویٰ کیرہ۔ دہشت گرد آتا مسخت بلوچستان نا شونداری و شونہالی نا کسر اٹی اڑاند شاغنگ ئس۔ ترجمان پاک فوج انا رِد اٹ علاقہ نا الس نا رکھ و زہمی ہند آتے کلیئر کننگ کن سیکورٹی فورس آک گوادر شار و اونا ایب کیب اٹی کلیئرنس آپریشن نا بناءِ کریر۔ جنگ اٹ دہشتگرد آتا ارادہ و ریاست نا عملداری ءِ نزور کننگ نا کوشست ءِ بے سہب کننگا۔ آئی ایس پی آر پارینے کہ کل آپریشن تے سیکورٹی فورس آتا جانی نسخان آن بیدس پورو کننگا۔ وخت اس کہ علاقہ ٹی امن و ایمنی و ریاست نا عملداری بحال کننگانے۔ آئی ایس پی آر تینا بیان اٹی پارے کہ اسہ بلوچ نیاڑی اسے جلہو اٹی زور اٹ اوار کننگ نئے بیرہ ریاست بلکہ بلوچ زالبول آتا حرمت نا برخلاف ہم ڈوہ اسے۔ دا واقعہ دہشتگرد آتا کنڈ آن بلوچ زالبول آتے پروپیگنڈہ نا وڑ انا دروشم اٹ کاریم اٹ اتنگ نا کوشست ءِ پیدوار کیک۔ ترجمان پاک فوج انا رِد اٹ دہشتگرد آک السی جوزہ غاتے وگائفنگ و تینا کارروائی تے دروغ نا تقدس تننگ کن بلوچ زالبول آتا استحصال کننگ اٹی ءُ۔ دا وڑ انا کارروائیک بلوچ و اسلامی روایت آتیان چَپ ءُ، ہرافتے ٹی زالبول آتے عزت و شرف دوئی ءِ۔ آئی ایس پی آر پارے کہ بلوچستان نا الس پدریسہ دافتے مسترد کرسا بسنے ہرافک اوفتا پن آ دتر شولرہ، و او دہشتگرد آتا دا فریب ءِ ہم چارہ۔ آئی ایس پی آر نا رِد اٹ قومی ایکشن پلان نا رد اٹ بنجائی اپیکس کمیٹی نا منظور کروک وژن عزمِ استحکام نا رِد اٹ دہشت گردی تور مہم پورو رفتار اٹ برجا سلک۔ ترجمان پاک فوج دا ارادگی نا دوارگی ءِ کرے کہ سیکورٹی فورس و کانود نافذ کروک ادارہ غاک ملک آن پیشن نا کاٹم خواجہی و مخ تفی اٹ دہشت گردی نا چٹفنگ کن پُرعزم ءُ و بلوچستان اٹی امن، سوگوی و شونداری کن تینا کارروائی تے برجا تخرہ۔ وزیراعلیٰ بلوچستان میر سرفراز بگٹی گوادر اٹی تفوئی کمپنی نا خورک آ کیمپ آ فتنہ الہندوستان نا دہشتگرد آتا جلہو ءِ بے سہب کننگ و کارروائی ٹی ہفت دہشتگرد ءِ خلنگ آ سیکورٹی فورس آتا کسبی لائخی‘ جیرت و ارادگی نا ستاءِ کرینے‘ وزیراعلیٰ میر سرفراز بگٹی پارے کہ سیکورٹی فورس آک وخت آ و گچین کارروائی کرسا دہشتگرد آتا پراگندہ ارادہ غاتے بے سہب کریر۔ بلوچستان اٹی بے امنی تالان کننگ و صوبہ نا تعمیر و شونداری نا عمل ءِ نسخان رسیفنگ نا کوشست آتے سرسہب مننگ کن الیپنہ۔