ہسپتال آتیٹی ڈاکٹر و ایلو طبی کارندہ غاتا وخت آ حاضری ءِ پک کننگے،اسسٹنٹ کمشنر استا محمد

اُستا محمد، ڈپٹی کمشنر اُستا محمد محمد رمضان پلال نا پارت آ اسسٹنٹ کمشنر اُستا محمد ماریہ شمعون ڈسٹرکٹ ہیڈکوارٹر (ڈی ایچ کیو) ہسپتال اُستا محمد نا دورہ ءِ کرے، ہراڑے او ہسپتال نا جم حالیت، جتاجتا بشخ آتا فعالیت، طبی کارندہ غاتا حاضری، دارو تا ساڑی گری و ناجوڑ آتے فراوان کروک طبی آسراتی تا جم جاچ ءِ ہلک۔ دا وخت آ او ہسپتال نا وارڈ، جنرل او پی ڈی، لیبر روم، لیبارٹری، فارمیسی، نیوٹریشن سینٹر و ویکسینیشن نا بشخ آتا دورہ ءِ کرسا تعلقدار آسراتی تا فراوانی و انتظامی باندات نا جاچ ءِ ہلک۔ دورہ ناوخت آ ہسپتال نا جم حالیت عمومی وڑ اٹ است جمی ناسوب گوندنگا ولے گڑاس وارڈز آتا حالیت و گڑاس بشخ آتا فعالیت اٹی نزوریک مون آ بسر۔ جاچ انا وخت آ پنچ آن بیرہ اِرا ڈاکٹر ڈیوٹی آ ساڑی ئسر، وخت اس کہ ایلو مسہ ڈاکٹر نا ساڑی مفننگ ناسوب آن طبی کارندہ غاتا حاضری و ناجوڑ آتے وخت آ طبی آسراتی تا فراوانی تون تعلقدار حالیت آتا جاچ ءِ ہلنگا۔ اسسٹنٹ کمشنر دا ہیت آ زور شاغا کہ ہسپتال اٹی ڈاکٹر و ایلو طبی کارندہ غاتا وخت آ حاضری ءِ پک کننگے تاکہ ناجوڑ آتے درمان کن بے گرج مشکل آک مون تروئی تمپس۔ جنرل او پی ڈی فعال خننگا ولے ہموڑے دارو تا کمتی ہم خننگا ہرا ناجوڑ آتے درمان نا آسراتی فراوان کننگ نا رد اٹ اسہ اہم ءُ ویل اسے۔ ہندا وڑ لیبر روم انا حالیت ہم خراب خننگا وخت اس کہ جتاجتا وارڈ آتا حالیت اٹی گچینی نا گرج محسوس کننگا۔ اسسٹنٹ کمشنر تعلقدار کمامدار آتا چکار ءِ دا نزوری تا کنڈ آ کرسا دارو تا وخت آ فراوانی، وارڈ انا حالیت ءِ گچین جوڑ کننگ و لیبر روم اٹی المی آسراتی تا ساڑی گری ءِ پک کننگ نا گرج آ زور شاغا۔ ایلو کنڈ آ ہسپتال نا لیبارٹری، نیوٹریشن سینٹر، فارمیسی و ویکسینیشن نا بشخ آک فعال ئسر ہراڑے تعلقدار کارندہ غاک تینا ڈیوٹی آ ساڑی ئسر۔ دا بشخ آتیٹی فراوان کروک آسراتی تا جاچ ءِ ہلسا اسسٹنٹ کمشنر ہسپتال نا کل بشخ آتیٹی خذمت آتا گچینی و انتظامی نظم و ضبط ءِ برجا تخنگ نا اہمیت آ زور شاغا۔ اسسٹنٹ کمشنر ماریہ شمعون پیدوار کرے کہ سرکاری ہسپتال آتیٹی بروک آ ناجوڑ آتے وخت آ، آب اٹوو گچین طبی آسراتی تا فراوانی تعلقدار کمامدار آتا بنداوی زمواری ءِ۔ او ہسپتال نا انتظامی باندات آتے ٹی گچینی‘ طبی کارندہ غاتا حاضری ءِ پک کننگ، دارو تا ساڑی گری ءِ گچین کننگ و وارڈ آتتون اوار لیبر روم انا حالیت ءِ گچین کننگ آ زور شاغسا پارے کہ الس ءِ جانجوڑی نا آسراتی تا فراوانی ٹی مون تروک ویل آتا ایسری کن گچین گام گیج المی ءِ‘ تاکہ ناجوڑ و اوفتا خاہوت ءِ گچین طبی چاگڑد دوئی مرے۔