دہشت گردی نا تخریبی ڈٹ آتے بے سہب کروک سیکورٹی فورس آتیا گمر ءِ، شاہدرند

کوئٹہ، وزیراعلیٰ بلوچستان نا کمکار حوالکاری و سیاسی باندات شاہد رند گوادر اٹی تفوئی کمپنی نا خورک آ کیمپ آ فتنہ الہندوستان نا دہشت گرد آتا جلہو ءِ بے سہب کننگ و کارروائی ٹی ہفت دہشت گرد آتے خلنگ آ سیکورٹی فورس آتا وخت آ کارروائی، کسبی لائخی و ارادگی نا ستاءِ کرینے۔ شاہد رند پارے کہ تفوئی کمپنی نا خورک آ کیمپ ءِ شست کننگ نا کوشست ءِ بے سہب کننگ سیکورٹی فورس آتا سنبرینگوک مننگ و کسبی چاہنداری نا پاش شاہدی ءِ۔ گچین کارروائی نا کمک اٹ دہشت گرد آتا تخریبی ڈٹ ءِ بے سہب کروک سیکورٹی کارندہ غاک مچ آ قوم انا گمر ءُ۔ او پارے کہ فتنہ الہندوستان نا دہشت گرد آک بلوچستان اٹی بے امنی تالان کرسا صوبہ نا تعمیر و شونداری نا کسر ءِ توننگ اٹی ہچ گہس سرسہب مفسہ۔ بلوچستان نا امن، سوگوی و شونہالی نا برخلاف سازش کروک آتے ہر پڑ آ بے سہبی تون مون تروئی تمک۔ وزیراعلیٰ نا کمکار پارے کہ دہشت گردی نا کمک اٹ الس اٹی بھیم و خلیس ودی کننگ و صوبہ ٹی شونداری و زرگزرانی سرجز آتے نسخان رسیفنگ نا کوشست آتے ہچ گہس سرسہب مننگ کن الیپنہ۔ سیکورٹی فورس آتا نزور مفروک ارادگی و کسبی لائخیک دہشت گرد آتیکن پیدوار کلہو ءُ کہ اوفتا پراگندہ مسخت آتے امر کہ مرے بے سہب کننگک۔ شاہد رند پارے کہ بلوچستان اٹی مدامگی امن و الس نا جان و مال انا رکھ حکومت نا اہم اولیت آتیٹی اوار ءِ۔ دہشت گردی نا پورو چٹفنگ کن قومی یکجہتی، اجتماعی ارادگی و سیکورٹی ادارہ غاتا پدریسہ کوشست آک المی ءُ۔ او پارے کہ مچ آ قوم دہشت گردی نا برخلاف جنگ اٹی سیکورٹی فورسز آتتون ہم کوپہ سلوک ءِ۔ بلوچستان نا شونداری‘ شونہالی و امن نا سفر ءِ لتاڑ کننگ نا اسہ کوشست اسے ہم سرسہب مننگ کن الیپنہ و صوبہ ءِ پرامن و شونہال جوڑ کننگ کن کوشست آک برجا سلرہ۔