ناجوڑ آتے وخت و آب اٹنگا طبی آسراتی تا فراوانی ءِ اولیت تننگے،اسسٹنٹ کمشنر جعفر آباد

ڈپٹی کمشنر جعفرآباد خالد خان نا پارت آ اسسٹنٹ کمشنر دھیرج کالرہ ڈسٹرکٹ ہیڈکوارٹر ہسپتال نا دورہ ءِ کرے، ہراڑے ناجوڑ آتے فراوان کروک طبی آسراتی تا جم جاچ ءِ ہلک۔ حوال نارد اٹ ڈپٹی کمشنر جعفرآباد خالد خان نا خصوصی پارت نا رد اٹ اسسٹنٹ کمشنر دھیرج کالرہ ڈسٹرکٹ ہیڈکوارٹر ہسپتال نا دورہ ءِ کرے، ہراڑے او ہسپتال نا جتا جتا بشخ آتا دورہ ءِ کرسا ناجوڑ آتے فراوان کروک طبی آسراتی، درمان نا بست وبند و ایلو باندات آتارد اٹ آگاہی دوئی کرے۔ دا وخت آ اسسٹنٹ کمشنر ہسپتال نا جتاجتا وارڈ آتا جاچ ءِ ہلک و ہموڑے درمان مروک ناجوڑ آتتون اوڑدہی کرسا اوفتے فراوان کروک طبی آسراتی، ڈاکٹر آتا رویہ، دارو تا دوئی مننگ و درمان نا رد اٹ جم معلومدار کرے۔ او ہسپتال اٹی ساڑی طبی کارندہ غاتا کارکڑد و ناجوڑ آتے مون تروک ویل آتا بابت ہم معلومداری دوئی کرے تاکہ الس ءِ جانجوڑی نا گچین آسراتی تا فراوانی ءِ پک کننگ مرے۔ اسسٹنٹ کمشنر دھیرج کالرہ ڈاکٹر و پیرامیڈیکل اسٹاف ءِ پارت کرسا پارے کہ ناجوڑ آتے وخت آ و آب اٹنگا طبی آسراتی تا فراوانی اولیکو اولیت مروئی تمک و دا رد اٹ ہچ وڑ انا ڈیوالئی و بے پرواہی ءِ اسُل سگنگ مفک۔ او پارے کہ سرکاری ہسپتال آتیٹی بروک ناجوڑ آتے درمان نا گچین آسراتی فراوان کننگ تعلقدار کارندہ غاتا بنداوی زمواری ءِ، ہندا سوب آن ڈاکٹر و ایلو کارندہ غاک تینا ڈیوٹی ءِ گچین وڑ اٹ سر ایتر و ناجوڑ آتتون خوش اخلاقی و ہمدردی اٹ پیش بریر۔ او مستی پارت کرے کہ ناجوڑ آتے المی دارو تا فراوانی، سفائی نا بست وبند و طبی آسراتی تا دوئی مننگ آ خصوصی چکار کننگے تاکہ الس ءِ درمان دوئی کننگ اٹ مشکل آک مون تروئی تمپس۔ او پیدوار کرے کہ ضلعی انتظامیہ الس ءِ جانجوڑی تون اوار بنداوی آسراتی تا فراوانی کن کل دوئی وسیلہ غاتے کاریم اٹ اتنگ اٹی ءِ و سرکاری ادارہ غاتا کارکڑد ءِ گچین جوڑ کننگ کن چاروکی نا عمل ءِ برجا تخنگک۔